په لندن کې د فلسطین ډیپلوماتیک ماموریت بشپړ سفارت ته لوړ شو
په لندن کې د فلسطین دیپلوماتیک ماموریت په رسمي توګه د سفارت په کچه لوړ شو، وروسته له هغې چې بریتانیې د ۲۰۲۵ کال په سپټمبر کې د فلسطین دولت په رسمیت وپېژانده. دا اقدام، چې د جنورۍ له پنځمې نیټې څخه نافذ دی، د دواړو دولتونو ترمنځ د بشپړو دیپلوماتیکو اړیکو د ټینګښت په لور یو رسمي ګام بلل کېږي.
د "فلسطین د دولت سفارت" په نوم د دې ماموریت نوی عنوان، په داسې حال کې دی چې استرالیا او کاناډا په څېر هېوادونو هم په دې وروستیو کې د فلسطین دولت په رسمیت پېژندلی دی.
په بریتانیا کې د فلسطین د دولت سفیر، حسام زوملوټ، په خپله ایکس پاڼه لیکلي چې له ماموریت څخه سفارت ته دا لوړوالی د بریتانیې او فلسطین په اړیکو کې یو مهم بدلون دی. هغه دا "د فلسطین د خلکو د ازادۍ او خپلواکۍ په اوږده سفر کې یو مهم ګام" وباله. زوملوټ زیاته کړه، "د بریتانیې د خلکو پیوستون موږ سره مرسته کړې چې دې ځای ته ورسېږو او په راتلونکې اوږده لاره کې به هم خورا مهم وي."
د منځني ختیځ لپاره د بریتانیې وزیر، هامیش فالکنر، مخکې ویلي و چې د دې پرېکړې موخه "د دوه دولتیز حل د پایښت ساتنه او د اسرائیلي او فلسطینی خلکو لپاره د تلپاتې سولې په لور د یوې لارې جوړول دي." فالکنر په لندن کې د سفارت پرانیستل تایید کړل او د دیپلوماتیکو اړیکو د رسمي کېدو هرکلی یې وکړ.
هغه په غزه کې روان بشري ناورین ته هم اشاره وکړه او د مرستو په رسولو کې یې د ځینو پرمختګونو یادونه وکړه. هغه وویل: "غزې ته ډېر لارۍ ننوځي، او دا د هرکلي وړ ده. خو مهمې لارې لا هم تړلې دي، کاروانونه بېرته ګرځول کېږي، طبي او د سرپناه توکي بند دي، او پر نادولتي موسسو بندیز لګول شوی دی."
د سفارت دا لوړوالی د فلسطیني چارواکو سره د بریتانیې د نوې ښکېلتیا ښکارندويي کوي، په داسې حال کې چې په غزه کې د بشري اړتیاوو د پوره کولو په برخه کې پراته خنډونه هم په ګوته کوي.
