د اروپايي ټولنې د بهرني سیاست مشرې، کایا کالس په ناټو کې د اروپا د پیاوړي رول غوښتنه وکړه.
کایا کالس د دوشنبې په ورځ وویل چې له اروپا څخه د امریکايي سرتېرو د احتمالي وتلو وخت، چې ویل کېږي په راتلونکو ۶ څخه تر ۱۲ میاشتو کې به ترسره شي، "حیرانونکی" دی. هغې ټینګار وکړ چې اروپا باید په ناټو کې خپل رول پیاوړی کړي.
هغې په یریوان کې د اروپا د سیاسي ټولنې په اتمه ناسته کې وویل: "له اروپا څخه د امریکايي سرتېرو د احتمالي وتلو په اړه له ډېر پخوا راهیسې خبرې روانې وې، خو د دې اعلان وخت حیرانونکی دی." کالس زیاته کړه چې دا پرمختګ په ناټو کې د "اروپايي ستنې" د پام وړ پیاوړي کولو او پخپله د اروپا لخوا د "زیاتو هڅو" اړتیا په ګوته کوي.
هغې وویل: "امریکايي سرتېري په اروپا کې یوازې د اروپايي ګټو د ساتنې لپاره نه دي، بلکې هغوی د امریکا ګټې هم ساتي." کله چې د ډونالډ ټرمپ د دریځ په اړه وپوښتل شول، کالس وویل چې په دغه غونډه کې د امریکا کوم استازی شتون نه درلود چې د خپلې ادارې دریځ روښانه کړي.
دا څرګندونې وروسته له هغه کېږي چې پنټاګون په جرمني کې د خپلو سرتېرو د شمېر د کمولو اعلان وکړ. جرمني په اروپا کې د امریکا تر ټولو لوی نظامي مرکز دی، خو اوس د ایران د جګړې او سوداګریزو تعرفو پر سر د واشنګټن او د هغې د اروپايي متحدینو ترمنځ کړکېچ مخ په زیاتېدو دی.
د پنټاګون یوه ویاند وویل چې د امریکا د دفاع وزارت د مشر په امر به شاوخوا ۵۰۰۰ سرتېري له جرمني څخه وایستل شي. دا ګام د ټرمپ له هغو څرګندونو وروسته اخیستل کېږي چې ویلي یې وو واشنګټن په جرمني کې پر خپل نظامي حضور له سره غور کوي. دا پرېکړه په ځانګړي ډول وروسته له هغه وشوه چې د جرمني لومړي وزیر فریډریک ميرز پر امریکا نیوکه وکړه چې د ایران په جګړه کې د وتلو روښانه ستراتیژي نه لري.
کالس همدارنګه د روانو کړکېچونو او د ایران د جګړې په منځ کې د قفقاز سیمې ستراتیژیک اهمیت ته اشاره وکړه او ویې ویل چې د یریوان سرمشریزې د مقاومت او نښلون اهمیت ثابت کړ. هغې "منځنی دهلېز خورا مهم" وباله او ویې ویل چې په منځني ختیځ کې وروستیو پرمختګونو د سوداګریزو لارو د تنوع او پر حساسو ټرانزیټي لارو د تکیې د کمولو اړتیا بیا تایید کړه.
هغې په پای کې وویل: "له همدې امله نښلون او دا بدیلې لارې خورا حیاتي دي."
