د تورکیې ولسمشر وویل: «زه باور لرم هغه ظالم چې د نتنیاهو په نوم پېژندل کېږي، د نړۍ د مسلمانانو په لاس به یو لازم درس واخلي.» ده دا څرګندونې پر غزه د اسرائیلو د جګړې په ترڅ کې له فلسطینیانو سره د پیوستون په موخه کړي دي.
د تورکیې ولسمشر رجب طیب اردوغان د چهارشنبې په ورځ د لوی اختر د لمانځه نه وروسته د مبارکۍ پیغام وړاندې کړ. اردوغان په خپل پیغام کې لوی اختر یو "روحاني برکت" وباله او هیله یې څرګنده کړه چې دا مناسبت به تورکیې، د تورکیې ملت، اسلامي نړۍ او ټول بشریت ته خیر او برکت راوړي.
هغه وویل: «ټولو هغو وروڼو او خویندو ته چې زموږ د روحاني جغرافیې په بېلابېلو برخو کې، په ځانګړې توګه په غزه کې، دا اختر په غم، درد او ژور خپګان سره لمانځي، زه د خپل ځان او خپل ملت په استازیتوب د پیوستون قوي پیغام وړاندې کوم او هغوی هر تن ته په جلا جلا توګه د لوی اختر مبارکي وایم.»
د چهارشنبې په ورځ په ټوله تورکیه او اسلامي نړۍ کې په میلیونونو خلکو د اختر لمونځونه ادا کړل. اردوغان چې په استانبول کې د "چاملیجا" په جامع جومات کې د اختر له لمانځه وروسته له خبریالانو سره خبرې کولې، وویل چې دیني اخترونه د ټولنیزو اړیکو او متقابل ملاتړ د پیاوړتیا لپاره دي. هغه زیاته کړه: «تر هر څه وړاندې، اخترونه د مینې، درناوي، یووالي، پیوستون ، اتحاد او یووالي ورځې دي.»
د تورکیې مشر وویل چې په غزه کې وضعیت په تورکیه او ټوله نړۍ کې د مسلمانانو پر جشنونو سیوری غوړولی دی. اردوغان د اسرائیلو پر لومړي وزیر بنیامین نتنیاهو سختې نیوکې وکړې، هغه یې "ظالم" وباله او هیله یې څرګنده کړه چې د نړۍ مسلمانان به په غزه کې د اسرائیلو د کړنو پر وړاندې متحد شي.
هغه وویل: «زه په دې هم باور لرم چې هغه ظالم چې د نتنیاهو په نوم پېژندل کېږي، د نړۍ د مسلمانانو په لاس به یو لازم درس واخلي.»
تورکیه په غزه کې د اسرائیلو د نظامي عملیاتو یو له خورا سختو منتقدینو څخه ده. اردوغان په وار وار د سمدستي اوربند، د بشري مرستو د پراخ لاسرسي او پر اسرائیلو د نړیوال فشار غوښتنه کړې ده.
د هغه دا څرګندونې په داسې حال کې مخې ته راځي چې د نړۍ مسلمانان د غزې او نږدې ختیځ روانو کړکېچونو او بشري اندېښنو ته په کتو لوی اختر لمانځي.
لوی اختر د حضرت ابراهیم (ع) د هغې سرښندنې یاد تازه کوي چې د خدای په حکم یې د خپل زوی قربانۍ ته چمتووالی ښودلی و. مسلمانان د دغه حکم د پر ځای کېدو په یاد څاروي قرباني کوي او غوښه یې پر بې وزلو او خپلوانو ویشي.
