د بریتانیا حکومت به د ۲۰۲۹ کال د عمومي ټاکنو نه مخکې د فلسطین دولت په رسمیت وپیژني، دا خبره د حکومت یو وزیر وکړه.
کله چې ترې وپوښتل شول چې آیا دا پیژندنه به په دې پارلمان کې ترسره شي، رینولډز وویل: "په دې پارلمان کې، هو. زما مطلب دا دی، هغه څه ته چې اړتیا لرو که چیرې په اړه يي اجماع رامنځته شي خامخا به وشي."
هغه زیاته کړه: "خو مه هېروئ، موږ دا یوازې یو ځل کولی شو. که موږ دا په داسې ډول وکړو چې یوازې د نوم لپاره وي او د دې شخړې پای ته رسولو کې مرسته ونکړي، نو بیا هیڅ ګټه نلري؟"
د غزې په کړکېچن وضعیت په اړه ، هغه وویل: "د هوايي مرستو په اړه خبره دا ده چې موږ نشو انتظار کولی ، موږ باید یو څه وکړو."
"موږ ټول د انسانیت په برخه کې خپلې تشې او کمي ګانې په ډیره ښه او روښانه توګه وینو."
د راپورونو له مخې، د بریتانیا لومړی وزیر کییر سټارمر د حکومت د ځینو لوړپوړو غړو له خوا تر فشار لاندې دی چې سمدستي د فلسطین دولت په رسمیت وپیژني.
د پارلمان د بهرنیو چارو کمیټې هم په دې وروستیو کې له حکومت څخه غوښتنه وکړه چې د فلسطین دولت په رسمیت وپیژني او د اسرائیلیانو او فلسطینیانو لپاره د دوه دولتونو حل لارې لپاره له خپلو متحدینو سره په جرئت او زړورتیا چمتووالی ونیسي.
د کمیټې مشره، ایملي تورنبري، په یوه بیان کې وویل چې د بریتانیا د خلکو په منځ کې د حکومت په اړه "لویه ناهیلې" شته چې تل یې ډېر لږ او ډېر ناوخته عمل کړی دی.
په سټارمر باندې د فشار د بلې نښې په توګه، له ۲۰۰ څخه زیاتو پارلماني غړو د ګوندونو ترمنځ یوه ګډ لیک لاسلیک کړی چې له هغه څخه یې غوښتنه کړې چې د فلسطین دولت په رسمیت وپیژني.
