د انګلستان روغتیا وزیر : اسرائیل باید د فسلطینیانو پر وړاندې خپل چلند سم کړي

د انګلستان د روغتیا وزیر وېس سټریټینګ د یکشنبې په ورځ وویل چې اسرائیل باید خپل چلند سم کړي او د فلسطینیانو پر وړاندې تاوتریخوالي ته جدي پاملرنه وکړي.

د انګلستان د روغتیا وزیر دا څرګندونې د انګلستان یو له لویو موسیقي فیستیوالونو څخه وروسته ، د انګلستان نامتو ریپ موسیقۍ ډلې "باب وېلن" غړي بوبي وېلن لخوا د  "فلسطین لپاره ازادي" او مرګ په اسرائیلي پوځ د شعارونو ورکولو نه وروسته وکړې.

سټریټینګ دغه شعارونه "وېرونکي" وبلل، خو په عین حال کې یې د اسرائیلي حکومت څخه وغوښتل چې په خپلو اقداماتو بیا کتنه وکړي، په ځانګړې توګه د اشغال شوي لویدیځې غاړې کې د ناقانونه اسرائیلي مېشتو کسانو لخوا د تاوتریخوالي په اړه.

د اسرائیلو سفارت په ټولنیزو رسنیو کې د دې کړنې غندنه وکړه او خبرداری یې ورکړ چې دا د "افراطي ژبې عادي کولو او د تاوتریخوالي ستایلو" په اړه اندېښنې راپورته کوي.

سټریټینګ د سکای نیوز سره په خبرو کې وویل: "زه به د اسرائیلو سفارت ته هم ووایم چې د خپلو اتباعو او د لویدیځې غاړې مېشتو کسانو د چلند په اړه خپل چلند سم کړي."

"نو، تاسو پوهېږئ، زه د اسرائیلو سفارت جدي ټکی منم، خو هیله لرم چې دوی د خپلو اتباعو لخوا د فلسطینیانو پر وړاندې د تاوتریخوالي په اړه جدي چلند وکړي."

د یکشنبې په ورځ، ناقانونه اسرائیلي مېشتو کسانو د اشغال شوي لویدیځې غاړې په یوه فلسطیني ځايي ټولنه برید وکړ، په داسې حال کې چې په یوه جلا پېښه کې درې فلسطینیان د اسرائیلي پوځ د ډزو له امله ټپیان شول.

د فلسطیني سرچینو په وینا، تېره میاشت په ټوله اشغال شوې سیمه کې لږ تر لږه ۴۱۵ د مېشتو کسانو بریدونه ثبت شوي دي.

د اسرائیلي حکومت د معلوماتو له مخې، د روان کال په لومړۍ نیمایي کې ناقانونه مېشتو کسانو د فلسطینیانو پر وړاندې ۴۱۴ بریدونه ترسره کړي، چې دا د ۲۰۲۴ کال په پرتله ۳۰ سلنه زیاتوالی ښيي.

د ۲۰۲۳ کال د اکتوبر په میاشت کې د غزې پر وړاندې د اسرائیلو د برید له پیل راهیسې، د فلسطین د روغتیا وزارت په وینا، په اشغال شوي لویدیځې غاړې کې لږ تر لږه ۹۸۶ فلسطینیان وژل شوي او له ۷۰۰۰ څخه زیات ټپیان شوي دي.

د نړیوالې محکمې د تیر کال په جولای کې د اسرائیلو لخوا د فلسطیني سیمو اشغال ناقانونه وباله او د لویدیځې غاړې او ختیځ بیت المقدس څخه د ټولو مېشتو کسانو د ایستلو غوښتنه یې وکړه.