د غزې دولتي رسنیو دفتر د پنجشنبې په ورځ د "غزې د ادارې پر ملي کمېټې" غږ وکړ چې په "بېړني" ډول دغه سیمې ته ننوځي او خپلې دندې پیل کړي. دغه دفتر ټینګار وکړ چې دولتي بنسټونه او کارمندان هر ډول همکارۍ ته بشپړ چمتووالی لري.

په اعلامیه کې ویل شوي: «د روانو سیاسي او اداري بدلونونو په رڼا کې او د بنسټیزو چارو د منظم فعالیت او د اړینو خدماتو د دوام په موخه، موږ یو ځل بیا د غزې د ادارې ملي کمېټې ته ښه راغلاست وایو او د خپلو دندو او ملي مسوولیتونو د ترسره کولو لپاره د هغوی پر بېړني شتون ټینګار کوو.»

دغه دفتر زیاته کړه چې دوی چمتو دي اړوند واکونه ور وسپاري او په مسلکي او قانوني چوکاټونو کې ټول اړین ګامونه پورته کړي ترڅو د اتباعو او کارمندانو حقونه خوندي او خدمات په لوړ کیفیت او شفافیت سره دوام ومومي.

ملي یووالی او سیمې ته د کمېټې د ننوتلو خنډونه

په اعلامیه کې "د فلسطین د خاورې پر یووالي او د لویدیځې غاړې او غزې ترمنځ پر سیاسي جغرافیې" ټینګار شوی او ویل شوي چې په دې حساس پړاو کې د ملي یووالي پیاوړتیا تر ټولو لومړیتوب لري.

دا غوښتنه په داسې حال کې کېږي چې دغې کمېټې لا په غزه کې خپل کار نه دی پیل کړی. کمېټې د جنورۍ په نیمايي کې د مصر په پلازمېنه قاهره کې خپل کار پیل کړ، خو سیمې ته یې د غړو ننوتل د اسراییلو تر کنټرول لاندې لارو له لارې امنیتي همغږۍ ته اړتیا لري. تر اوسه د کمېټې لخوا د دې ځنډ په اړه کوم رسمي وضاحت نه دی ورکړل شوی او اسراییلو هم په دې اړه تبصره نه ده کړې.

مهم حقایق:

·        د اکتوبر میاشتې د ۱۰مې نېټې یوې اوربند هوکړې د اسراییلو دوه کلنه جګړه پای ته ورسوله چې د ۲۰۲۳ کال د اکتوبر په ۸مه پیل شوې وه.

·        فلسطیني چارواکي وايي چې په دې جګړه کې له ۷۲،۰۰۰ څخه ډېر کسان شهیدان او څه باندې ۱۷۱،۰۰۰ نور ټپیان شوي دي.

·        د ملګرو ملتونو د اټکل له مخې، د غزې د بیارغونې لګښت نږدې ۷۰ میلیارده ډالره دی.

·        د غزې د روغتیا وزارت په وینا، د اوربند له پیل راهیسې هم د اسراییلو په بریدونو کې لږ تر لږه ۵۹۱ فلسطینیان شهیدان شوي دي.