تر اوسه کومې ډلې د دې برید مسوولیت پر غاړه نه دی اخیستی.

د "سوي سدرن ګاز کمپنۍ" (SSGC) یوه ویاند وویل، نامعلومو کسانو د بلوچستان ایالت د مرکز کوېټې ښار په څنډو کې د ۱۸ انچه قطر لرونکې د ګازو یوه اصلي نللیکه په بمونو الوزولې ده. بلوچستان یو له ناارامو ایالتونو څخه دی چې له افغانستان او ایران سره ګډه پوله لري.

هغه زیاته کړه چې د دغه برید له امله د ښار یو شمېر برخو او لږ تر لږه پنځو نورو ولسوالیو ته د ګازو رسول بند شوي دي.

په دې سیمه کې بېلتون غوښتونکي وسله وال او اسلامپالي سختدریځې ډلې فعالیت لري.

بېلتون غوښتونکي له ډېرې مودې راهیسې د دولت پر ضد جګړه کوي، حکومت او پوځي تاسیسات په نښه کوي. دوی په اسلام اباد کې مرکزي حکومت تورنوي چې د سیمې له معدني او طبیعي بډایه سرچینو څخه ځايي خلکو ته د هغوی حق نه ورکوي او هغوی یې له خپلو حقونو بې برخې کړي دي.

د ګازو د شرکت (SSGC) ویاند وویل چې انجینران د نللیکې د بېرته ترمیمولو په کار بوخت دي.