بریتانیا به د روانۍ اونۍ په پای کې فلسطین دولت په رسمیت وپیژني.

د 'ائي پېپر' (The i Paper) ورځپاڼې د حکومتي سرچینو په حواله راپور ورکړی چې برتانیا به د دې اونۍ په پای کې وروسته له هغه چې د امریکا ولسمشر ډونالډ ټرمپ خپل رسمي سفر پای ته ورسوي، په رسمي توګه د فلسطین دولت په رسمیت وپېژني.

د جولای په میاشت کې، لومړي وزیر کېیر سټارمر ویلي وو چې برتانیا به د سپټمبر په میاشت کې په نیویارک کې د ملګرو ملتونو په عمومي اسمبلۍ کې د فلسطین دولت په رسمیت وپېژني، مګر دا چې اسرائیل په غزه کې د بشري وضعیت د ښه کولو او اوربند منلو لپاره "جدي ګامونه" پورته کړي.

راپور د چهارشنبې په ورځ زیاته کړه، د ټرمپ له تګ وروسته د دې اعلان د ځنډولو لامل دا دی چې دا کار "کېدای شو له واشنګټن سره تاوتریخوالی لا پسې ژور کړي، وروسته له هغه چې ټرمپ او د بهرنیو چارو وزیر مارکو روبیو په غزه کې د اسرائیلو له ځمکنیو عملیاتو څخه کلک ملاتړ اعلان کړ."

د لومړي وزیر ویاند وویل چې د دې پېژندنې موخه د دوه دولتي حل لارې د بقا ساتنه ده.

هغه زیاته کړه: "دولت لرل د فلسطیني خلکو مسلم حق دی، او دا خورا مهمه ده چې د دوه دولتي حل لارې د بقا ساتنې لپاره موږ دا مسلم حق په ډاګه کړو."

تېر کال، ایرلنډ، ناروې او اسپانیا د هغو ۱۴۷ هېوادونو په نوملړ کې شامل شول چې اوس په رسمي توګه فلسطین پېژني.

فرانسې هم اعلان کړی چې د ملګرو ملتونو د عمومي اسمبلۍ پر مهال به د فلسطین دولت په رسمیت وپېژني، او په دې سره به د جي-۷ (G7) لومړی غړی هېواد شي چې دا کار کوي. جي-۷ د نړۍ د اوو مخکښو صنعتي هېوادونو او ډیموکراسیو یوه غیر رسمي ټولنه ده.