تورکیې د اسرائیلي ځواکونو لخوا پر ډیپلوماټانو د ډزو په اړه ډیر سخت غبرګون وښود او د اسرائیلو نه يي ددې زشت او ضد انساني عمل د حساب پوښتنې غوښتنه وکړه.
انقرې د اسرائیلي ځواکونو لخوا د فلسطین په جنین سیمه کې د تورکي ډیپلوماټانو په ګډون پر نړۍوالو ډیپلوماټانو ډزې کول په ډیره کلکه توګه وغندل او له نړۍوالې ټولنې هم وغوښتل چې سخت عکس العمل وښايي.
د تورکیې د بهرنیو چارو وزارت په یوه پېښه کې چې د اشغال شوي لویدیځې غاړې په جِنین ښار کې د اسرائیلي سرتېرو لخوا د ډیپلوماتانو په یوه ډله، چې پکې د تورکیې د قونسلګرۍ یو چارواکی هم شامل و، ډزې وشوې، کلکه غندنه کړې ده.
وزارت د چهارشنبې په ورځ په یوه توند بیان کې دغه برید د ډیپلوماتیکو خوندیتوبونو لپاره یوه "جدي ګواښ" او د اسرائیل لخوا د نړیوالو قوانینو او بشري حقونو "سیستماتیکه بې پروايي" وبلله.
په بیان کې راغلي: "موږ د اسرائیلي سرتېرو لخوا د ډیپلوماتانو په یوه ډله، چې پکې د تورکیې د قونسلګرۍ یو چارواکی هم شامل دی، د ډزو پېښه په کلکو ټکو غندو." بیان ټینګار وکړ چې د ډیپلوماتانو ژوند په خطر کې اچول شوی، چې انقرې دا عمل د نه منلو وړ وباله.
وزارت د پېښې د سمدستي څېړنې غوښتنه وکړه او ټینګار یې وکړ چې د دې پېښې مسؤل کسان باید حساب ورکړي. همدارنګه، وزارت له نړیوالې ټولنې وغوښتل چې د دې پېښې په وړاندې کلک دریځ ونیسي.
په بیان کې زیاته شوې: "د ډیپلوماتانو په نښه کول نه یوازې د انفرادي خوندیتوب لپاره جدي ګواښ دی، بلکې د هغو متقابل احترام او باور لپاره هم چې د دولتونو ترمنځ د اړیکو بنسټ جوړوي هم جدي ګواښ دی."
تورکیې له نړیوالو لوبغاړو وغوښتل چې دغه برید په "تر ټولو کلکو ټکو" وغندي او د اسرائیل په اشغال شویو فلسطیني سیمو کې د دې هېواد د زیاتېدونکي "معافیت" په وړاندې عملي ګامونه پورته کړي.
تر اوسه د دې پېښې په اړه د اسرائیلي چارواکو له خوا کوم رسمي غبرګون نه دی څرګند شوی.
