د پاکستان په بلوچستان ایالت کې د عملیاتو پر مهال ۸ وسله وال ووژل شول

د پاکستان پوځ اعلان وکړ چې د بلوچستان په ایالت کې د امنیتي عملیاتو پر مهال ۸ وسله وال چې ویل کیږي د هند له ملاتړه برخمن وو، له منځه وړل شوي دي.

د پاکستان د پوځ د عامه اړیکو څانګې (ISPR) په یوه خپره کړې خبرپاڼه کې ویلي، چې د دغه ایالت په کلات سیمه کې د وسله والو ډلو پر وړاندې عملیات ترسره شوي دي.

په خبرپاڼه کې ویل شوي چې ۸ وسله وال چې د هند له ملاتړه برخمن بلل شوي، وژل شوي او د هغوی وسلې، مهمات او چاودېدونکي توکي هم نیول شوي دي.

د پاکستان د ترهګرۍ ستونزه

په پاکستان کې وسله وال بریدونه، په ځانګړې توګه خیبر پښتونخوا او بلوچستان ایالتونو کې زیات شوي دي.

په دواړو ایالتونو کې وسله والې ډلې چې د پښتنو او بلوڅو قومونو د حقونو د دفاع ادعا کوي، د پاکستان پر امنیتي ځواکونو او ملکي وګړو بریدونه کوي.

اسلام اباد ادعا کوي چې TTP (تحریک طالبان پاکستان) په افغانستان کې مرکزونه لري او له هغه ځایه خپل بریدونه تنظیموي، خو افغان حکومت دا ادعاوې ردوي.

په بلوچستان کې بیا د بلوڅو د ازادۍ پوځ (BLA) بریدونه ډېر دي. BLA غواړي چې بلوچستان ایالت له پاکستان څخه جلا شي او بلوڅ خلک پر دغې سیمې واکمن شي.