په افغانستان کې د طالبانو حکومت د سې شنبې په ورځ د یوه امریکايي زنداني وګړي د خوشې کولو اعلان وکړ، چې تر یو کال زیات وخت یې په بند کې تېر کړی و. دا پرېکړه د هغه د کورنۍ له لوري د نوموړي د ازادۍ په اړه د یوه لیک له لېږلو وروسته شوې ده.
د افغانستان د بهرنیو چارو وزارت ویلي، چې د ژبپوه او څېړونکي 'ډینس کویل' کورنۍ د افغانستان ستر مشر (امیرالمؤمنین) ته لیک لېکلی و او د اختر په مناسبت یې د هغه د بښنې او خلاصون غوښتنه کړې وه. په اعلامیه کې راغلي: «د اسلامي امارت سترې محکمې د هغه د بند موده بسنه کونکې وبلله او د هغه د خوشې کېدو پرېکړه یې وکړه.»
دا اعلان د بهرنیو چارو د وزیر امیر خان متقي، د افغانستان لپاره د امریکا د پخواني ځانګړي استازي زلمي خلیلزاد، په کابل کې د متحده عربي اماراتو د سفیر سیف محمد الکیتبي او د کویل د کورنۍ د یوه غړي له کتنې وروسته وشو. وزارت زیاته کړې چې متحده عربي اماراتو د دغه خلاصون زمینه برابره کړې وه او دا پرېکړه د بشري خواخوږۍ او د 'ښه نیت' د څرګندولو په موخه شوې ده.
۶۴ کلن ډینس کویل د کابل په هوايي ډګر کې له زلمي خلیلزاد سره یو ځای په یوه لنډه خبري غونډه کې راڅرګند شو او هوسا ښکارېده. خلیلزاد خبریالانو ته وویل چې دا خلاصون یو «خورا مثبت پرمختګ او د چارواکو له لوري ښه پرېکړه ده.»
د ګوانتانامو د بندي برخلیک
بل خوا، په کیوبا کې د امریکا د ګوانتانامو په زندان کې د وروستي افغان بندي کورنۍ یو ځل بیا د هغه د خلاصون غوښتنه وکړه. ۲۹ کلن ابراهیم رحیم وویل، چې د زلمي خلیلزاد له لارې یې د امریکا ولسمشر ډونالډ ټرمپ ته یو لیک لېږلی او د خپل پلار 'محمد رحیم' د روغتیايي ستونزو له امله یې د هغه د ازادۍ غوښتنه کړې ده.
محمد رحیم په ۲۰۰۸ کال کې ګوانتانامو ته وړل شوی و او د سي آی اې (CIA) له لوري تورن شوی و چې د القاعده ډلې د مشر اسامه بن لادن نږدې ملګری و. د هغه زوی وویل: «موږ په لیک کې لیکلي چې موږ دلته ستاسو بندي خوشې کړ، نو تاسو باید هلته زموږ بندي هم خوشې کړئ.» دغې کورنۍ تر دې وړاندې د ۲۰۲۳ کال په نومبر کې هم د هغه د خلاصون غوښتنه کړې وه."
