د پاکستان د خیبر پښتونخوا ایالت په بنو سیمه کې د امنیتي ځواکونو په عملیاتو کې د پنځو وسله والو او د دوو سرتېرو د وژل کېدو خبر ورکړل شوی دی.
د پاکستان د پوځ د عامه اړیکو دفتر (ISPR) په یوه اعلامیه کې ویلي، چې د امنیتي ځواکونو پر کاروان د هغو وسله والو له خوا برید شوی چې ویل کیږي د هند ملاتړ ورسره دی.
په اعلامیه کې ویل شوي چې د خیبر پښتونخوا ایالت په بنو سیمه کې د استخباراتي معلوماتو پر بنسټ په ترسره شویو عملیاتو کې ۵ وسله وال وژل شوي او دوه پاکستاني سرتېري په نښته کې ژوند د لاسه ورکړی دی.
د پاکستان د ترهګرۍ ستونزه
په پاکستان کې وسله وال بریدونه، په ځانګړې توګه په خیبر پښتونخوا او بلوچستان ایالتونو کې ډېر شوي دي.
په دواړو ایالتونو کې وسله والې ډلې، چې د پښتنو او بلوڅو قومونو د حقونو د دفاع ادعا کوي، د پاکستان پر امنیتي ځواکونو او ملکي وګړو بریدونه کوي.
اسلام اباد ادعا کوي چې TTP په افغانستان کې مرکزونه لري او له هغه ځایه خپل بریدونه تنظیموي، خو د افغانستان حکومت دا ادعاوې ردوي.
په بلوچستان کې بیا د بلوچستان د ازادۍ پوځ (BLA) بریدونه ډېر تر سترګو کیږي. بي اېل اې له پاکستان څخه د بلوچستان ایالت د بېلتون غوښتنه کوي او غواړي چې پر دې سیمه بلوڅان واکمن وي.
