تورکیې د ۱۹۹۳ کال د نسل پرستۍ په اورلګیدنې برید کې د وژل شوو قربانیانو یادونه وکړه. دغه برید د آلمان په سولینګن ښار کې ترسره شو او د یوې تورکي کورنۍ پنځه غړي یې ووژل.
د چهارشنبې په ورځ د تورکیې د بهرنیو چارو وزارت په یوه بیان کې وویل: "موږ د نسل پرستۍ د سولینګن برید په ترڅ کې د خپلو پنځو وژل شوو وګړو یاد په درناوي کوو، چې ۳۲ کاله وړاندې یې خپل ژوند له لاسه ورکړ."
وزارت همدارنګه د مولوده ګینچ یادونه وکړه، چې په دې برید کې یې خپلې دوه لوڼې، دوه لمسیانې او یو وراره له لاسه ورکړه. هغه وروسته په آلمان کې د سولې او زغم د غوښتنو له امله د پخلاینې سمبول وګرځېده. مولوده ګینچ په ۲۰۲۲ کال کې وفات شوه او ډېری وخت د "عاقلې مور" په نوم یادېږي.
وزارت وویل: "په دې مناسبت، موږ یو ځل بیا د مولودې ګینچ یاد په درناوي او مننې سره تازه کوو."
د نسل پرستۍ او اسلام دښمنۍ پر وړاندې مبارزه
په بیان کې زیاته شوې چې تورکیه به د نسل پرستۍ، کډوالو دښمنۍ او د اسلام پر وړاندې د کرکې د زیاتیدو پر وړاندې په هر ډګر کې مبارزه ته دوام ورکړي.
د ۱۹۹۳ کال د می میاشتې په ۲۹مه نېټه، د آلمان څلورو ښي اړخو ځوانانو چې عمرونه یې د ۱۶ او ۲۳ کلونو ترمنځ وو، د سولینګن په ښار کې د تورکي ګینچ کورنۍ کور ته اور واچاوه. په دې برید کې پنځه کسان ووژل شول او ۱۴ نور ټپیان شول.
د برید درې عاملین په ۱۰ کلونو بند محکوم شول، او څلورم کس ته ۱۵ کاله بند ورکړل شو.
دغه برید د آلمان خلک سخت ولړزول او نړیوال غبرګونونه یې راوپارول، چې په دې هېواد کې یې د نسل پرستۍ او ادغام په اړه بحثونه راپورته کړل.
