په ملګرو ملتونو کې د تهران استازي، ایرواني وویل: "هغو کسانو چې د نړیوالو بېړیو چلولو په اړه یې اندېښنه ښودلې، هېڅ یو یې زړه نه ښه کوي چې په نننۍ ناسته کې دغه ترهګریز عمل (کلابندۍ) ته اشاره وکړي یا یې وغندي."
په ملګرو ملتونو کې د تهران استازي ویلي چې ایران د تېلو په بډایه فارس خلیج کې د امنیت د تامین لپاره، د امریکا او اسرائیل د بل برید په وړاندې ضمانتونو ته اړتیا لري.
سفیر امیر سعید ایرواني د دوشنبې په ورځ د امنیت شورا هغې غونډې ته وینا وکړه چې د بحرین په نوښت جوړه شوې وه او په کې لسګونو هیوادونو د هرمز تنګي د کنټرولولو له امله پر ایران نیوکې وکړې.
ایرواني غونډې ته وویل: "په فارس خلیج او پراخه سیمه کې تلپاتې ثبات او امنیت یوازې د ایران په وړاندې د تېري د دایمي بندیدو، د بیا نه تکرار د باوري ضمانتونو، او د ایران مشروع حاکمیت او ګټو ته د بشپړ درناوي له لارې ترلاسه کیدی شي."
وروسته خبریالانو سره په خبرو کې، ایرواني شکایت وکړ چې هېوادونو یوازې پر ایران نیوکې وکړې، خو د امریکا لخوا لګول شوې سمندري کلابندي (Blockade) یې یاده نه کړه. هغه زیاته کړه: "خو له هغو کسانو څخه چې د نړیوالو بېړیو چلولو په اړه یې اندېښنه ښودلې، هېڅ یو یې زړه نه ښه کوي چې په نننۍ ناسته کې دغه ترهګریز عمل ته اشاره وکړي یا یې وغندي."
'بې ځایه او پراخ تېری'
ایرواني همدا راز امریکا او اسرائیل د ایران پر وړاندې د "بې ځایه او پراخ تېري" په پیلولو تورن کړل او هغوی یې د تاوتریخوالي زیاتولو او د هرمز تنګي په سمندري امنیت کې د ګډوډۍ رامنځته کولو مسؤل وبلل.
هغه وویل: "د فبرورۍ له ۲۸مې راهیسې، متحده ایالاتو او اسرائیلي رژیم د ایران پر وړاندې یو بې ځایه او پراخ یرغل پیل کړی دی." هغه ادعا وکړه چې دا اقدامات د ملګرو ملتونو له منشور څخه سرغړونه ده او سیمه ییز او نړیوال ثبات دواړه ګواښي. هغه پر امریکا تور پورې کړ چې سمندري کلابندي یې لګولې، د ایران سوداګریزې کښتۍ یې نیولې او عمله یې زنداني کړې ده؛ هغه اقدامات چې ده غیرقانوني او د "سمندري غلا" په څېر وبلل.
ایرواني وویل: "دا خطرناک او زیاتېدونکي اقدامات له نړیوالو قوانینو سرغړونه ده... او د تېري په مانا دي."
نوموړي زیاته کړه چې ایران د هرمز تنګي د یو ساحلي هېواد په توګه، د بېړیو د خوندي تګ راتګ د ډاډمنولو او د دښمنانه نظامي موخو لپاره د دې اوبلارې د کارولو د مخنیوي لپاره "اړین او عملي ګامونه" پورته کړي دي.
