بقایي وویل چې «د ایران او تورکیې ترمنځ اړیکې په ټولو برخو کې ځانګړې دي.»
اسماعیل بقایي په پلازمېنه تهران کې په خپله اونیزه خبري ناسته کې د خبریالانو پوښتنې ځواب کړې.
بقایي په دې بیان سره چې امریکا د «اقتصادي جګړې» د اغېز د زیاتولو په موخه پر خپلو سوداګریزو شریکانو فشار راوړي ترڅو د ایران خلاف ګامونه پورته کړي او د دغه فشار د لوړولو لپاره له رسنیو هم ګټه اخلي، زیاته کړه:
«له ګاونډیانو او په ځانګړې توګه له تورکیې سره د ایران اړیکې په مطلوب او لوړه کچه کې دي. په ډېری مسایلو، په ځانګړې توګه د صهیونیستي رژیم د سلطې غوښتنې د هڅو په اړه مشترکې اندېښنې او بېلابېل ګډ لیدلوري لرو. زموږ ډیپلوماټیکه دستګاه هڅه کوي چې د خپلو موخو په ترلاسه کولو کې د امریکا د بریا مخه ونیسي.»
«د سیمې هېوادونو ته سپارښتنه کوو چې د یمن په اړه حقایق وګوري»
په سعودي عربستان کې پر نللیکو د بریدونو په اړه د یوې پوښتنې په ځواب کې بقایي ادعا وکړه چې ایران د یمن په پرمختګونو کې مستقیم لاس نه لري.
بقایي وویل: «ایران د یمن په مسایلو کې لاسوهنه نه کوي. موږ د سیمې هېوادونو ته سپارښتنه کوو چې د یمن په اړه شته حقایق درک کړي.»
«سعودي عربستان د عمان ناستې د ځنډولو غوښتنه کړې وه»
د ایران ویاند د عمان د بهرنیو چارو وزیر بدر البوسعیدي د هغې پرېکړې په اړه چې د هرمز تنګي په تړاو جوړېدونکې سیمه ییزه ناسته وځنډېده، وویل: «سعودي عربستان په مسقط کې د ناستې د ځنډولو غوښتنه کړې وه.»
د عمان د بهرنیو چارو وزیر پرون اعلان وکړ چې د هرمز تنګي په اړه د ایران او عربي هېوادونو ترمنځ ناسته چې ټاکل شوې وه د سپتمبر پر ۱۴مه ترسره شي، ځنډېدلې ده.
