د الکترونیکي او پوسټي اړیکو ادارې په وینا، وړاندې کوونکي مکلف دي چې د ټیک ټاک اړوند آی پي ادرسونه او DNS سرورونه بند کړي.

لومړی وزیر ادي راما د دې بندیز اعلان د ډسمبر په میاشت کې وکړ، کله چې په ټولنیزو رسنیو کې د یوې شخړې له امله د ۱۴ کلن زده کوونکي وژل کېدو او د بل ټپي کېدو پېښه د پلازمېنې تیرانا په یوه ښوونځي کې رامنځته شوه.

ټیک ټاک د ځوانانو ترمنځ ډېر مشهور دی، چې د لنډو ویډیوګانو نه ختمېدونکی جریان وړاندې کوي، او په ټوله نړۍ کې یې له یو میلیارد څخه زیات فعال کاروونکي لري.

خو دا چینایي ملکیت لرونکی اپلیکیشن په پرله‌پسې ډول له لانجو سره مخ شوی دی.

په امریکا کې پر ټیک ټاک د جاسوسۍ تورونه لګېدلي، او په اروپایي اتحادیه کې هم تر پلټنو لاندې دی، چې ګواکې په رومانیا کې یې د ولسمشرۍ ټاکنو په ګټه د یوه ښي اړخي نوماند لپاره لاسوهنه کړې.

خو په البانیا کې چارواکو ټیک ټاک په ښوونځیو کې د جګړو او تاوتریخوالي د هڅونې په تور ملامت کړی دی.

بلخوا، اپوزیسیون د دې بندیز پر وړاندې د مظاهرو غوښتنه کړې، او ویلي یې دي چې دا بندیز به د مې په میاشت کې د پارلماني ټاکنو لپاره د دوی کمپاین اغېزمن کړي.

په نورو هېوادونو کې هم ټیک ټاک په پرله‌پسې ډول د کاروونکو د محدودولو، د مبهمو الگوریتمونو له لارې د محتوا د کنټرول، او د غلطو معلوماتو، غیرقانوني، تاوتریخوالي یا ناوړه موادو د خپرولو په تورونو سره مخ دی، په ځانګړي ډول د ځوانانو ترمنځ.

یوشمېر هېوادونو د ټیک ټاک د لنډې مودې لپاره بندیزونه لګولي، چې په دې کې پاکستان، نیپال او فرانسه د نیو کلیډونیا په سیمه کې شامل دي.

په څو هېوادونو کې د ټیک ټاک لخوا د حقیقت موندنې لپاره لسګونه سازمانونه ګمارل شوي، چې د هغو ویډیوګانو کره‌والی وڅېړي چې ممکن غلط معلومات ولري.