د دواړو هېوادونو د بهرنیو چارو وزیرانو د تورکيې-سعودي د همغږۍ شورا د درېیمې غونډې ګډه مشري کړې وه.
د تورکیې ولسمشر رجب طیب اردوغان په پلازمېنه انقره کې د سعودي عربستان د بهرنیو چارو له وزیر شهزاده فیصل بن فرحان آل سعود سره لیدنه وکړه
د چهارشنبې په ورځ په ولسمشرۍ ماڼۍ کې د تړلو دروازو تر شا په دې غونډه کې د بهرنیو چارو وزیر هاکان فیدان، د عامه اړیکو رئیس برهان الدین دوران، د ولسمشرۍ ستر سلاکار حسن دوغان، او د بهرنۍ پالیسۍ لوړپوړي سلاکار عاکف چغتای کلیچ هم ګډون کړی و.
تر دې مخکې، د دواړو هېوادونو د بهرنیو چارو وزیرانو په انقره کې د تورکيې-سعودي د همغږۍ شورا د درېیمې غونډې ګډه مشري وکړه، او د غزې په ګډون یې پر دوه اړخیزو اړیکو او سیمه ییزو پرمختګونو خبرې وکړې.
فیدان پر 'این سوسیال' شبکې په خپره شوې یوه اعلامیه کې وویل، چې دا غونډه د دواړو هېوادونو د اړوندو وزارتونو او ادارو په ګډون جوړه شوې وه.
هغه وویل چې دواړو لورو په ستراتیژیکو برخو لکه سوداګرۍ، انرژۍ، دفاع، پوهنې، کلتور، سیاحت او ټرانسپورټ کې د کمیټو پر کارونو بیا کتنه وکړه، او په ورته وخت کې یې دوه اړخیزې اړیکې په یو بنسټیز چوکاټ کې وڅېړلې.
فیدان دا هم وویل چې په خبرو کې سیمه ییزې مسألې، په ځانګړې توګه د غزې وضعیت، تر پوښښ لاندې ونیول شوې، او دواړو هېوادونو د دیپلوماتیکو او ځانګړو پاسپورټونو لرونکو لپاره د ویزې له اړتیا څخه د دوه اړخیز معافیت یو تړون لاسلیک کړ.
د تورکیې د بهرنیو چارو وزیر له خپل سعودي سیال او ورسره پلاوي څخه د دوی د سفر مننه وکړه او هیله یې څرګنده کړه چې شوې هوکړې به دواړو هېوادونو ته ګټورې تمامې شي.
