سټیو بینن د ټرمپ په لومړۍ دوره کې د لوړ پوړي سلاکار په توګه دنده ترسره کړې او لا هم د "امریکه بیا ځواکمنه کړئ غورځنګ یو پیژندل شوی غږ دی.

د امریکا د ولسمشر ډونالډ ټرمپ پخواني سلاکار سټیو بینن غوښتنه کړې چې د اسرائیلو د لومړي وزیر بنیامین نتانیاهو زوی، یایر نتانیاهو دې له امریکا متحده ایالاتو څخه وایستل شي او د جګړې لومړۍ کرښې ته دې واستول شي، دا په داسې حال کې ده چې پر ایران د دواړو هیوادونو ګډ بریدونه دوام لري.

بینن په "رییل امریکا وائس" (Real America's Voice) تلویزیوني شبکه کې د خبرو پر مهال، پوښتنه وکړه چې ولې یایر نتانیاهو په میامي کې په تفریح بوخت دی، په داسې حال کې چې پر ایران د امریکا او اسرائیلو بریدونه روان دي.

هغه وویل: "د نتانیاهو زوی چې په میامي کې دی، سبا یې له هغه ځایه وباسئ." نوموړي د امریکا د کورني امنیت له وزارت  څخه وغوښتل چې اقدام وکړي.

بینن زیاته کړه: "د کورني امنیت وزارت چې کله ورته اړتیا وي، چیرته وي؟ هغه بیرته هلته (اسرائیلو ته) ولیږئ. پوځي دریشي ورواغوندئ. اجازه ورکړئ چې هغه د جګړې په لومړۍ کرښه کې دنده ترسره کړي."

بینن د واشنګټن د متحدینو، د خلیج عربي هیوادونو پر شهزادګانو هم نیوکه وکړه او استدلال یې وکړ چې هغوی هم باید د لندن په څیر ښارونو څخه وشړل شي او په خلیج کې جګړې ته واستول شي، ځکه امریکا اشاره کړې چې ښايي ځمکني عملیات پیل کړي.

نه یایر او نه هم د هغه ورور "اونر" د اسرائیلو جبري پوځي خدمت بشپړ کړی، سره له دې چې دواړه د قانوني عمر خاوندان دي.

سټیو بینن د ټرمپ په لومړۍ دوره کې د لوړ پوړي سلاکار په توګه کار کړی او لا هم د (MAGA) غورځنګ یو له مهمو غږونو څخه ګڼل کیږي.

متحده ایالاتو او اسرائیلو د فبرورۍ له ۲۸مې راهیسې پر ایران هوایي بریدونه کړي، چې له امله یې د هغه وخت د ستر مذهبي مشر علي خامنه ای په ګډون له ۱۳۴۰ څخه ډیر کسان وژل شوي دي.

ایران په ځواب کې پر اسرائیلو، اردن، عراق او د خلیج پر هغو هیوادونو چې د امریکا پوځي اډې په کې دي، د ډرون او میزایلو بریدونه کړي دي، چې له امله یې ځاني تلفات او د زیربناوو ویجاړۍ رامنځته شوي او نړیوال بازارونه او هوایي چلند یې ګډوډ کړی دی.