د فرانسې ولسمشر له خپل هېواده غوښتنه کوي چې له افریقا سره د برابرۍ او شراکت پر بنسټ اړیکې غوره کړي.
د فرانسې ولسمشر ایمانویل مکرون منلې چې هېواد یې په افریقا کې د تورکیې، چین او امریکا په څېر سیالانو ته خپل ځای له لاسه ورکړی، او پړه یې د فرانسوي بنسټونو او شرکتونو لسیزې بې غوري او کبر بللی دی.

مکرون د "افریقا فارورډ" سوداګریز فورم په پای غونډه کې وویل چې فرانسه په تېرو ۲۵ کلونو کې "په افریقا کې له ټکان سره مخ شوې" او دا بهیر یې "عادي" او حتی مثبت بللی.

هغه وویل، فرانسوي شرکتونو او ادارو پر تاریخي اړیکو ډېره تکیه کوله او په دې کې پاتې راغلل چې سیال پاتې شي.

هغه وویل: "دوی باور درلود چې یوه ځانګړې ساحه شته چې په هغه کې فرانسوي اوسېدل په دې مانا وو چې هر څه په اتوماتيک ډول ورته پرانیستي دي."

مکرون وویل، افریقايي هېوادونه ډېرو سیالو شریکانو ته په مخه کولو سره معقول اقتصادي انتخابونه کوي، او پر دغې لویه وچه یې د انقرې او بېجینګ مخ پر ودې رول ته اشاره وکړه.

مکرون وویل، افریقا نور داسې ماډل نه مني چې یوازې پر مرستو ولاړ وي یا بهرني ځواکونه د افریقایي بازارونو لپاره حل لارې وټاکي.

هغه د "فکري انقلاب" غوښتنه وکړه او له فرانسې یې وغوښتل چې یوازې د مرستې ورکولو "عمودي منطق" پرېږدي او پر ځای یې د برابرۍ او شراکت پر بنسټ اړیکې غوره کړي.

مکرون وویل، نوې تګلاره باید له افریقایي هېوادونو سره پر "ګډې پانګونې، ګډ تولید او ګډ نوښت" تمرکز وکړي.

هغه د افریقا پر قوي اقتصادي ظرفیت هم ټینګار وکړ او ویې ویل چې په وروستیو کلونو کې د دې لویې وچې وده تر سوېل ختیځې اسیا هم زیاته شوې ده.