د ایران ستر مذهبي مشر ایت الله علي خامنه اي د اوږدې مودې وروسته د لومړي ځل لپاره په یو عمومي مراسمو کې راڅرګند شو.
د ایران ستر مشر، ایت الله علي خامنه ای، د اسرائیلو سره د خپل هیواد د وروستۍ ۱۲ ورځنۍ جګړې له پیل راهیسې د لومړي ځل لپاره په تهران کې په یوه مذهبي مراسمو کې د ګډون سره راڅرګند شو .
د شنبې په ورځ د دولتي تلویزیون لخوا په خپره شوې یوه ویډیو کې ښودل کیږي چې د د ایران ستر مذهبي مشر په مذهبي مراسمو کې ګډونوالو ته ښه راغلاست وايي او خوشحاله ښکاري.
۸۶ کلن خامنه ای چې تورې جامې یې اغوستې وې ښکاري او ګډونوال د هغه سره مینه ښايي او د هغه پر ملاتړ شعارونه ورکوي.
دولتي تلویزیون وویل چې کلیپ د تهران په مرکزي امام خمیني جومات کې اخیستل شوی دی، چې د جمهوریت د بنسټ ایښودونکي په نوم نومول شوی.
خامنه اي، چې له ۱۹۸۹ کال راهیسې په واک کې دی، تېره اونۍ په یوه ثبت شوې ویډیو کې خبرې وکړې، خو له هغه وخت راهیسې چې اسرائیل د جون په ۱۳مه د ناڅاپي هوايي بریدونو سره جګړه پیل کړه، په عامه مراسمو کې نه و لیدل شوی.
د اسرائیل بمباري له ایران سره د لسیزو اوږدې سیوري جګړې وروسته وشوه، او موخه یې د اټومي وسلو د پراختیا مخنیوي وه - هغه خبره چې تهران په دوامداره توګه رد کړې ده.
د ایران قضايي قوې ویلي چې بریدونو په ایران کې له ۹۰۰ څخه ډیر کسان وژلي، پداسې حال کې چې د رسمي ارقامو له مخې، د ایران د توغندیو په غچ اخیستونکو بریدونو کې په اسرائیلو کې لږترلږه ۲۸ کسان وژل شوي دي.
