اوکراین د جګړې د شدت په ترڅ کې پر روسیې د امريکا جوړ شوي ATACMS توغندي ويشتلي دي.

د روسیې دفاعي ځواکونو ویلي دي چې  د اوکراین هغه سوپرسونیک بالېسټيک توغندي چې ورونېژ یې په نښه کړی و شنډ کړل؛ د مرګ ‌ژوبلې مخه یې ونیوله، خو څو ودانیو ته یې زیان ورسید.

د روسیې د دفاع وزارت د چهارشنبې په ورځ ويلي چې اوکرایني ځواکونو د روسیې په سویلي ښار ورونېژ کې د ملکي اهدافو پر لور د څلورو امریکایي جوړ شوي ATACMS توغندیو سره برید کړی دی.

د سې شنبې په ورځ، د اوکراین پوځ ويلي و چې د امریکا د ورکړل شوو ATACMS توغندیو په مرسته يې په روسیه کې پوځي اهداف وځپل، او دا يې د "څرګند پرمختګ" په توګه ياد کړ.

کیف دغه سیسټمونه په ۲۰۲۳ کال کې ترلاسه کړل، خو په لومړي سر کې يوازې د خپلو سیمو په کارولو محدود وو، چې شاوخوا پنځمه برخه يې د روسیې تر کنټرول لاندې ده.

د روسیې د دفاع وزارت په ټیلیګرام کې ویلي: "د روسیې S-400 هوايي دفاعي عمله او د Pantsir توغندي او توپ سيستمونو ټول ATACMS توغندي په هوا کې ویشتلي."

د وزارت په وینا، د ویجاړ شوو توغندیو راپرېوتلي ټوټې د ورونېژ د تقاعديانو کور، یتیمانو کور او یوه بل کور بامونو ته زیان رسولی، خو د ملکي وګړو د مرګ ‌ژوبلې یا ټپي کېدو راپور نه دی ورکړل شوی.

وزارت د توغندیو د ټوټو عکسونه خپاره کړل او ویې ویل چې د هوایی کشف ځواکونو د خارکیف سیمه د ATACMS د توغولو ځای په توګه پیژندلې.

روسیې ویلي چې د دوو اوکرایني څو توغندي لېږدونکو سیسټمونو د له منځه وړلو لپاره یې Iskander-M توغندي توغولي دي.

اوکراین مخکې هم د روسیې په خاورې د امريکا جوړ ATACMS توغندیو بریدونه کړي، په جنورۍ کې يې د روسیې د بلګورود په سیمه کې شپږ توغندي ویشتلي وو.

تېر کال، کله چې اوکراین پر روسیه د امريکا ATACMS او د بريتانيا Storm Shadow توغندي وویشتل، نو پوتین امر وکړ چې پر اوکراین يو هایپرسونیک توغندی وویشتل شي.

روسیې پر اوکراین بریدونه زیات کړي

د خارکیف والي اولېګ سینېګوبوف د چهارشنبې په ورځ ویلي چې د شپې د روسیې د ډرون برید لږ تر لږه ۳۶ کسان ټپیان کړي، چې پکې دوه ماشومان هم شامل دي.

یوولس ډرون الوتکو په سلوبیډسکي او اوسنوویانسکي ولسوالیو برید وکړ، چې په نهه پوړیزه ودانۍ کې یې اور ولګاوه او موټرونه، ګراجونه او یو سوپر مارکیټ یې زیانمن کړ.

رېسکیو ځواکونو ۴۸ کسان ایستلي، د پولیسو په وینا پکې دوه ماشومان د نهه او ۱۳ کلونو عمر لرونکي شامل وو، او پولیسو زیاته کړه: "ډاکټرانو ماشومانو ته د شدید فشار غبرګونونه تشخیص کړي دي."

مسکو پر اوکراین د انرژۍ د زیربناوو بریدونه زیات کړي، چې دا د ګازو د تأسیساتو پر وړاندې د اکتوبر میاشتې راهیسې تر ټولو لوی بمبارۍ کمپاین بلل کیږي.

د اوکراین ولسمشر ولادیمیر زیلنسکي اروپا ته سفر کړی ترڅو د اوکراین پوځ لپاره ملاتړ ترلاسه کړي د ژمي او د سولي خبرو د ځنډ له امله مهمې زیربناوې خوندي کړي.

اوکرایني ځواکونه، چې ستړي او کم شمیره دي، د ختیځې کرښې دفاع ته دوام ورکوي، په داسې حال کې چې روسي ځواکونو د سې شنبې په ورځ دوه کلي ونیول.