د تورکیې استخباراتو په استانبول کې د اسرائیلو د استخباراتو موساد لپاره د جاسوسۍ په تور یو تن ونیو.

امنیتي چارواکي وايي چې تورن کس د اسرائیل د استخباراتو د موساد لپاره کار کاوه او د اسرائیل د آنلاین عملیاتو د مرکز له غړي، فیصل رشید، سره یې اړیکه درلوده.

تورکیې د جمعې په ورځ وویل چې د اسرائیل د ملي استخباراتي ادارې (موساد) لپاره د جاسوسۍ په تور یې یو کس نیولی دی. د امنیتي چارواکو په وینا، دا تورن کس په استانبول کې د  څارنوالانو او پولیسو په ګډو عملیاتو کې نیول شوی دی.

د تورکیې ملي استخباراتو ریاست (MIT) وویل چې د سرکان چیچک په نوم تورن کس د "میټرون فعالیت" په نوم کوډ لرونکو عملیاتو په ترڅ کې نیول شوی دی.

امنیتي چارواکو وویل چې نیول شوي جاسوس د موساد لپاره کار کاوه او د اسرائیل د آنلاین عملیاتو د مرکز له غړي، فیصل رشید، سره یې اړیکه درلوده.

ویل کېږي چیچک منلې چې د رشید په غوښتنه یې په استانبول کې پر یوه فلسطیني فعال څارنه کوله، چې د منځني ختیځ په اړه د اسرائیل له سیاستونو سره مخالفت کوي.

د تورکیې د استخباراتو په وینا، چیچک – چې اصلي نوم یې محمد فاتح کیلیش دی – وروسته له هغه چې ډېر پوروړی شو، خپل نوم بدل کړ او په ۲۰۲۰ کال کې یې خپل سوداګریز کار پرېښود او د "پانډورا تحقیقاتي اداره" په نوم یې یو شخصي شرکت جوړ کړ.

ویل کېږي چې هغه له موسی کوش سره کار کړی، چې د اسرائیل لپاره د جاسوسۍ په تور په ۱۹ کاله بند محکوم شوی و، او له وکیل توغرول خان دیپ سره یې هم کار کړی، چې دواړه د دې لپاره مجرم پېژندل شوي وو چې له عامه ریکارډونو څخه یې شخصي معلومات د ګټې لپاره پر تحقیق کوونکو پلورل.

تورن کس د کریپټو له لارې پیسې ترلاسه کړې دي

چارواکو وویل چې چیچک د خپل تحقیقاتي کار له پیلولو وروسته د موساد پام ځانته راواړاوه. ویل کېږي چې د جولای په ۳۱مه، رشید د واټساپ له لارې له هغه سره اړیکه ونیوله او ځان یې د یوه بهرني حقوقي شرکت د کارکوونکي په توګه ور وپېژاند.

بیا رشید چیچک ته دنده وسپارله چې د استانبول په څنډه کې، په باشاک شهیر سیمه کې د یوه فلسطیني فعال د څلور ورځنۍ څارنې ماموریت ترسره کړي. د راپورونو له مخې، چیچک ته د اګست په لومړۍ نېټه د دې دندې د ترسره کولو لپاره د کریپټوکرنسۍ په بڼه ۴۰۰۰ ډالره ورکړل شول.

چیچک وروسته له هغه چې په انټرنیټ کې یې د هدف نوم ولټاوه، پوه شو چې هغه یو فلسطیني فعال دی. سره له دې چې پوهېده چې ملګری یې کوش د اسرائیل لپاره د جاسوسۍ په تور زنداني شوی، خو بیا یې هم دا دنده ومنله.

چارواکو وویل چیچک د رشید لخوا ورکړل شوې پته وکتله، خو ونه توانېد چې خپل هدف ومومي. هغه د اګست په لومړۍ او دوهمه د کرايي اپارتمان د لټون په پلمه د استوګنې کمپلکس ته ننوت او استطلاعي فعالیتونه یې ترسره کړل، خو ونه توانېد هغه معلومات راټول کړي چې موساد غوښتل.

د چارواکو په وینا، د اګست په درېیمه د اسرائیل جاسوس رشید له هغه سره اړیکه پرې کړه.