تورکیې د فلسطین لپاره د بشري مرستو همغږی کوونکی ټاکلی، څو په غزه کې د مرستو د هڅو څارنه وکړي.

تورکیه خپلې ټولې سرچینې په چټکۍ سره غزې ته د بشري مرستو رسولو، لنډمهاله سرپناه جوړولو او د فلسطیني کلا بیارغونې لپاره کاروي.

ډیپلوماټیکو سرچینو د پنجشنبې په ورځ وویل چې، تورکیې سفیر محمد ګلو اوغلو د فلسطین د بشري مرستو د همغږۍ کوونکي په توګه ټاکلی، څو په غزه کې د بشري مرستو فعالیتونه له نږدې وڅاري او له اړوندو ادارو او سیمه ‌ییزو چارواکو سره همغږي یقیني کړي.

د سرچینو په وینا، ګلو اوغلو به د غزې لپاره د اړینو بشري مرستو او لومړیتوبونو د پېژندنې لپاره کتنې وکړي، له ملګرو ملتونو د ادارو سره به همغږي ولري او د هغوی فعالیتونه به په غزه کې پیاوړي کړي، همدارنګه به ډاډ ترلاسه کړي چې د تورکیې له لوري استول شوې مرستې په اغېزمن ډول هغو ته ورسېږي چې په غزه کې ورته اړتیا لري.

د سرچینو د معلوماتو له مخې، ګلو اوغلو به خپلې دندې د ساحې په کچه د فعالیت کوونکو اړوندو ترک ادارو سره په همغږۍ کې ترسره کړي، د مصر او اردن له لارې د استول کېدونکو مرستو په اړه به له سیمه ‌ییزو چارواکو سره سلا مشوره وکړي، او د ناروغانو د انتقال په ګډون به د غزې لپاره د تورکیې د روغتیايي ملاتړ هڅې لا پیاوړې کړي.

غزې سره د تورکیې بشري مرستې

تورکیه د بشري مرستو په برخه کې اوږده او پیاوړې تاريخچه لري. دا هېواد، په داسې سیمه کې موقعیت لري چې پکې فعالې او کنګل شوې شخړې، طبیعي پېښې او ډله ‌ییز کډوال تګ راتګ تجربه کوي، په چټکۍ سره هغو ته مرسته رسوي چې اړمن وي، په ځانګړي ډول خپلو ګاونډیو هېوادونو لکه فلسطین او سوریه ته — پرته له دې چې د ژبې، مذهب، نژاد یا جنسیت توپیر وکړي.

تورکیه یو له هغو هیوادونو څخه دی چې د اسراییلو د بریدونو له پیل راهیسې یې غزې ته تر ټولو ډیرې بشري مرستې رسولي دي. په دې لړ کې، تورکیې له اکتوبر ۲۰۲۳ کال راهیسې د سمندر او هوا له لارې غزې ته ۱۰۲ زره ټنه بشري مرستې لېږدولي دي.

په غزه کې اوربند د دې فرصت برابر کړی چې دوامدارې او کافي بشري مرستې غزې ته ورسول شي.

د خپلو مرستو د دوام په توګه، تورکیې د ۲۰۲۵ کال د اکتوبر په ۱۴مه نېټه یوه کښتۍ د ۸۶۵ ټنه بشري مرستو سره له مرسین بندر څخه د مصر العریش بندر ته واستوله.