د اندونیزیا ولسمشر پرابوو سوبیانتو د یوه ښوونځي د سلمې کلیزې په مناسبت جوړې شوې غونډې ته د وینا پر مهال څو ځله د «ازاد فلسطین» شعارونه ورکړل.

د شنبې په ورځ د دې غونډې پر مهال، په اندونیزیا کې د فلسطین سفیر عبدالفتاح ا.ک. الستاري پرابوو ته یوه چفیه ډالۍ کړه.

د انتارا دولتي خبري اژانس د راپور له مخې، د اندونیزیا ولسمشر د دې دستمال له ترلاسه کولو وروسته بېرته سټېج ته راستون شو او ولیدل شول چې پر دغه دستمال یې خپلې سترګې پاکولې.

وروسته پرابوو څو ځله د «ازاد فلسطین» شعارونه ورکړل.

هغه دا هم وویل چې که اندونیزیا "پیاوړې" وي، نو "موږ کولی شو له خپلو هغو وروڼو او خویندو سره مرسته وکړو چې د بل رژیم لخوا تر ظلم لاندې دي."

پرابوو وویل چې د فلسطینیانو پر وړاندې روان بریدونه باید د اندونیزیا لپاره د خپل ملي ځواک د پیاوړي کولو په برخه کې د یوه هڅونکي لامل په توګه کار وکړي.

پرابوو وویل چې د یوه ملت ځواک د هغه پر ځان بسیاینې پورې اړه لري.

هغه وویل د یوه ملت ځواک پر ځان د بسیا کېدو په وړتیا پورې تړلی دی او اندونیزیا باید د خپلو طبیعي زېرمو په اغېزمنې ګټې اخیستنې سره خپل ځان مدیریت، خوندي او پیاوړی کړي.

پرابوو همداراز له تاریخ څخه پر زده کړې ټینګار وکړ ترڅو ډاډ ترلاسه شي چې اندونیزیا به بیا هېڅکله مستعمره نشي.

هغه وویل: "موږ باید کلک هوډ ولرو چې بیا هېڅکله د بل چا تر استعمار لاندې رانه شو. موږ باید پیاوړي واوسو."

د وروستیو شمېرو له مخې، د اوربند د هوکړې له پلي کېدو راهیسې د اسرائیلو لخوا د اوربند ماتولو له امله ۱،۳۸۱ فلسطینیان وژل شوي او ۴،۷۵۷ نور ټپیان شوي دي.

په غزه کې د اسرائیلو نسل وژنې، چې د ۲۰۲۳ کال د اکټوبر په ۸مه پیل شوې، ۷۳،۷۹۵ فلسطینیان وژلي، ۱۷۴،۸۶۹ نور یې ټپیان کړي او د غزې شاوخوا ۹۰ سلنه بنسټیزې ودانۍ او زیربناوې یې ویجاړې کړې دي.

په همدې حال کې، د شنبې په ورځ د اسرائیلو لخوا په دې فلسطینۍ سیمه کې د غزې د روغتیا وزارت د عمومي رییس منیر البرش د زوی په ګډون درې نور فلسطینیان هم وژل شوي دي.

سرچینې انادولو اژانس ته وویل چې بصیر البرش د شمالي غزې د جبالیا کډوالو کمپ لوېدیځ ته د الزهرا په ګاونډ کې په یوه برید کې چې نوموړی پکې په نښه شوی و، ووژل شو.

سرچینې زیاته کړه چې یو بل فلسطینی د غزې ښار ختیځ ته په شجاعیه سیمه کې د اسرائیلو د بې پیلوټه الوتکې په برید کې وژل شوی دی.