تورکیې ټول ۵۵ ځنګلي اورونه تر کنټرول لاندې راوستي، او عملیات دوام لري

د کرنې او ځنګلونو وزیر وايي چې د هوا او ځمکې ټيمونو له سختو موسمې شرایطو سره مقابله وکړه، خو خبرداری ورکوي چې د ځنګلي اورونو خطر تر اکتوبر پورې لا هم لوړ پاتې دی.

د تورکیې د کرنې او ځنګلونو وزیر ویلي، چې په تېرو ۲۴ ساعتونو کې رامنځته شوي ټول ۵۵ ځنګلي اورونه تر کنټرول لاندې راوستل شوي، او د سوځېدلو سیمو د یخولو (سړولو) عملیات لا هم روان دي.

ابراهیم یوماکلي د سه ‌شنبې په ورځ خبریالانو ته وویل، وروستی فعال اور د هېواد په شمال لوېدیځ بورسا ولایت کې، د حارمانجک په سیمه کې وو.

هغه زیاته کړه: "موږ د اور د بشپړ کنټرول لپاره هڅې روانې ساتلې دي — پنځه الوتکې، ۳۰ چورلکې او ۸۵۵ ځمکني وسایط پدې عملیاتو کې بوخت دي."

یوماکلي څرګنده کړه چې د سهار غبار او لوګي، له غرمې وروسته د قوي بادونو سره یوځای، هوایی عملیات ځنډولي وو.

هغه وویل: "د حالت تر کنټرول لاندې راوستلو تر تمې ډېر وخت ونیوه."

"په هرصورت، هرڅومره ژر چې هوا ښه شوه، موږ خپل هوایی غبرګون ګړندی کړ. موږ له وړاندې پر ځمکه، شپه او ورځ نه ستړي کیدونکي کار کوو."

هغه وویل چې په بورسا کې پرمختګ هڅوونکی دی او هیله‌ یې وښوده چې د ورځې وروستۍ برخې کې به ښه خبرونه شریک کړي.

وزیر همداراز خبرداری ورکړ چې د ځنګلي اورونو خطر لا هم لوړ دی او له خلکو یې وغوښتل چې بیداره پاتې شي او حتی تر ټولو کوچنی اور هم ژر راپور کړي.

هغه زیاته کړه: "خطر لا نه دی ختم شوی. موږ به لږ تر لږه تر اکتوبر پورې په چمتووالي کې پاتې شو."