تورکیه په انقره کې د ناټو په سرمشریزه کې د اروپا د دفاع د پیاوړتیا او د "ټرانزاټلانټیک پیوستون" د ساتلو لپاره د "کلکې ژمنې" تمه لري.
د تورکیې د اړیکو ریاست دفتر ویلي چې ولسمشر رجب طیب اردوغان او د جرمني لومړي وزیر فریډریک میرز په یوه ټیلیفوني اړیکه کې پر سیمه ییزو او نړیوالو مسایلو او همدارنګه پر دوه اړخیزو اړیکو بحث وکړ.
ولسمشر اردوغان د دوشنبې په ورځ وویل چې تورکیه له جرمني سره د خپلو اړیکو پیاوړتیا ته لومړیتوب ورکوي او د دې موخې لپاره یې د متقابلو ګامونو پر اخیستلو ټینګار وکړ.
د تورکیې ولسمشر زیاته کړه چې تورکیه په انقره کې د ناټو په راتلونکې سرمشریزه کې د اروپا د دفاع د پیاوړتیا او د "ټرانزاټلانټیک پیوستون" د خوندي ساتلو لپاره د غړو هېوادونو له خوا د یوې "کلکې ژمنې" تمه لري.
د روسیې او اوکراین د روانې جګړې په اړه، اردوغان د انقرې هڅو ته اشاره وکړه او ویې ویل چې ترکیه د تلپاتې سولې د تامین او د دواړو لورو ترمنځ د خبرو اترو د بیا پیلولو لپاره خپلو هڅو ته دوام ورکوي.
