د جنوبي چین په بحیره کې د ۳۰ دقیقو په ترڅ کې د امریکا د سمندري ځواکونو دوه الوتکو سقوط وکړ.
د امریکا سمندري ځواکونه وايي، د دواړو پېښو لاملونه تر څېړنې لاندې دي.
د امریکا د بحري ځواکونو د پاسفیک بیړۍ وویل، د یکشنبې په ماسپښین د USS نیمیتز په نوم د الوتکې وړونکې کښتۍ څخه یوه جنګي جټ الوتکه او یوه چورلکه د یو بل څخه په ۳۰ دقیقو کې د جنوبي چین په بحیره کې سقوط شوې.
په بیان کې ویل شوي، د MH-60R سي هاک هلیکوپترې درې کسیزه عمله وژغورل شوه، او د F/A-18F سوپر هورنټ جنګي جټ الوتکې دوه پیلوټانو ځانونه بهر وغورځول او په خوندي توګه وژغورل شول، او ټول پنځه واړه "خوندي او په باثباته حالت کې دي".
بیان زیاته کړه چې د دواړو پېښو لاملونه تر څېړنې لاندې دي.
د USS نیمیتز کښتۍ د واشنګټن ایالت په کیټسپ سمندري اډه کې خپل کورني بندر ته راستنیږي وروسته له هغې چې د دوبي ډیره برخه یې په منځني ختیځ کې د سوداګریزو کښتیو په وړاندې د یمن د حوثیانو د بریدونو په ځواب کې تیره کړې وه.
دا د کښتۍ له کاره لوېدو مخکې وروستۍ ماموریت دی.
یوې بلې الوتکې وړونکې کښتۍ، USS هیري ایس ټرومن، په وروستیو میاشتو کې په منځني ختیځ کې د ماموریت پرمهال له یو لړ پېښو سره مخ شوې وه.
د دسمبر په میاشت کې، د USS ګیټیسبرګ توغندي ویشتونکې کښتۍ په تېروتنې سره د ټرومن څخه یوه F/A-18 جټ الوتکه راوغورځوله.
بیا د اپریل په میاشت کې، یوه بله F/A-18 جنګي جټ الوتکه د ټرومن د هینګر له ډیک څخه ښکته شوه او په سره بحیره کې ولوېده.
او د می په میاشت کې، یوه F/A جنګي جټ الوتکه چې په سره بحیره کې پر کښتۍ د ناستې په حال کې وه، ظاهراً د هغو فولادي کیبلونو په نیولو کې پاتې راغله چې د ناستې الوتکو د درولو لپاره کارول کیږي، او له کښتۍ څخه بهر ولوېده، چې دوه پیلوټان یې ځانونه بهر غورځولو ته اړ کړل.
په دغو پېښو کې هیڅ یو سمندري سرتېری نه دی وژل شوی. د دغو پېښو د څېړنو پایلې لا نه دي خپرې شوې.
