د تورکیې ولسمشر رجب طیب اردوغان وايي، هغه نړیوال سیستم چې له دویمې نړیوالې جګړې وروسته جوړ شوی، په نږدې ټولو برخو کې خپل اعتبار له لاسه ورکړي. هغه په سوله، ثبات او عدالت باندې د نوي تمرکز غوښتنه وکړه.

د تورکیې ولسمشر د جمعې په ورځ وویل، هغه نړیوال سیستم چې د دویمې نړیوالې جګړې د ګټونکو لخوا رامنځته شوی و، نن ورځ په نږدې ټولو برخو کې د مشروعیت له ژور بحران سره مخ دی.

رجب طیب اردوغان د تورکیې د عامه اړیکو ریاست لخوا په استانبول کې جوړې شوې د "نړیوالې ستراتیژیکې اړيکې سرمشریزې ۲۰۲۶" ته په یوه ویډیويي پیغام کې وویل: "هغه نظم چې له دویمې نړیوالې جګړې وروسته د ګټونکو لخوا جوړ شوی و، په نږدې ټولو ډګرونو کې د مشروعیت له ژور بحران سره مخ دی."

هغه زیاته کړه: "هغه بنسټونه، اصول او ارزښتونه چې د دې سیستم ستنې دي، په تدریجي ډول خپله دنده او کارکړنه له لاسه ورکوي."

"نړۍ له یوه ننګونکي پړاو څخه تیریږي چې د نسل وژنو، جګړو او بحرانونو د زیاتوالي نښه ده؛ چیرته چې د ځواک سیالي د انرژۍ، ټیکنالوژۍ او سوداګرۍ په څیر برخو کې خپره شوې، او شخړې په زیاتیدونکې توګه د خبرو اترو پر ځای د زور له لارې د هوارولو هڅه کیږي."

ولسمشر اردوغان وویل: "لکه په غزه کې، د تراژیدیو پای ته رسول او په ټوله نړۍ کې، په ځانګړې توګه په سیمه کې، د سولې، ثبات او سوکالۍ بیا راګرځول تر بل هر وخت ډیر مهم دي."

هغه د ناسمو معلوماتو او تحریف شویو بیانیو په وړاندې د مبارزې لپاره د ارتباطي او همکارۍ میکانیزمونو پر پیاوړتیا ټینګار وکړ او له حکومتونو، اکاډمیکو شخصیتونو، مدني ټولنې او فکري مرکزونو  څخه یې وغوښتل چې په دې برخه کې ډیر فعال رول ولوبوي.

د تورکیې مشر زیاته کړه: "ترکیه به په کلکه خپل پر اصولو ولاړ، هوډمن او پر سوله متمرکز دریځ چې په بشري ارزښتونو او عدالت ولاړ دی، وساتي؛ او خپل ټول امکانات به نه یوازې زموږ په سیمه کې، بلکې په ټوله نړۍ کې د سولې او امنیت د بیا رغولو لپاره وکاروي."