په هالنډ کې شاوخوا ۲۵۰ زره کسانو د اسرائیل پر وړاندې د حکومت د لا قوي اقداماتو غوښتنې لپاره لاریون وکړ

ددې مظاهرو تنظیموونکو ویلي "د ټاکنو په میاشت کې د پلازمېنې په اوږدو کې د یوې سرې کرښې په ایستلو سره، موږ د هالنډ له سیاستوالو او اوسېدونکو غواړو چې پرېکنده دریځ غوره کړي."

لسګونه زره کسان د "سرې کرښې" په نوم د یوه ستر لاریون په ترڅ کې د امستردام سړکونو ته راوتلي او غوښتنه یې کړې چې د هالنډ حکومت دې په غزه کې د اسرائیل د روانې نسل وژنې جګړې پر وړاندې لا قوي اقدامات وکړي.

د تنظیموونکو په وینا، د یکشنبې په ورځ په دې لاریون کې شاوخوا ۲۵۰ زره کسانو ګډون کړی و. د بله پلوه د هالنډ د دولتي نشراتي ارګان په وینا دا په وروستیو کلونو کې په هالنډ کې یو له سترو لاریونونو څخه ګڼل کېږي.

لاریون کوونکي چې سرې جامې یې اغوستې وې، په "میوزیم‌ پلاین" (Museumplein) کې راټول شول او بیا یې د پلازمېنې په اوږدو کې لاریون وکړ ترڅو د اسرائیل په اړه د حکومت د دریځ پر وړاندې یوه "سمبولیکه سره کرښه" وباسي.

تنظیموونکو وویل چې په مې او جون میاشتو کې په هاګ ښار کې په ورته لاریونونو کې په ترتیب سره شاوخوا ۱۰۰،۰۰۰ او ۱۵۰،۰۰۰ کسانو برخه اخیستې وه. تنظیموونکو زیاته کړه چې دوی دریم لاریون ځکه وکړ چې د جګړې د درولو لپاره "ډېر لږ څه کېږي."

هغوی په یوه اعلامیه کې ویلي: "د ټاکنو په میاشت کې د پلازمېنې په اوږدو کې د یوې سرې کرښې په ایستلو سره، موږ د هالنډ له سیاستوالو او اوسېدونکو غواړو چې پرېکنده دریځ غوره کړي."

له ۱۳۰ څخه زیاتو د بشري حقونو ډلو، لکه د بښنې نړیوال سازمان ، اکسفام نویب ، پکس ، او د حقونو فورم له دې لاریون څخه ملاتړ وکړ. څو یهودي سازمانونو هم په دې لاریون کې ګډون وکړ ترڅو د اسرائیل د تګلارو پر وړاندې خپل مخالفت څرګند کړي او ټینګار یې وکړ چې دوی د ټولې یهودي ټولنې استازیتوب نه کوي.

'د نسل وژنې له ملاتړه لاس واخلئ'

لاریون کوونکو داسې شعارونه او بینرونه لېږدول چې له هالنډ څخه یې غوښتل "د نسل وژنې له ملاتړه لاس واخلي" او په غزه کې د سمدستي اوربند لپاره فشار راوړي، چېرته چې اسرائیل د ۲۰۲۳ کال له اکتوبر راهیسې تر ۶۷،۰۰۰ ډېر کسان وژلي دي. د اوربند او دایمي سولې لپاره خبرې اترې د امریکا د ولسمشر ډونالډ ټرمپ د ۲۰ ماده‌یز پلان د یوې برخې په توګه روانې دي.

لومړي وزیر ډیک شوف پر X ټولنیزه شبکه د لاریون په اړه غبرګون وښود او ویې ویل چې دی د لاریون کوونکو "غوسه، اندېښنې او د بې وسۍ احساس" درک کوي.

هغه وویل، "په غزه کې بې حده کړاو د نه منلو وړ او نه توجیه کېدونکی دی." او زیاته یې کړه چې حکومت یې پر اسرائیل غږ کړی چې خپله تګلاره بدله کړي او د اوربند د ترلاسه کولو لپاره فشارونه زیاتوي.

هغه د ټرمپ وړاندیز "هیله بښونکی" وباله او ویې ویل چې هالنډ د جګړې د پای ته رسولو لپاره د منځګړو، قطر او مصر، له هڅو ملاتړ کوي.

شوف زیاته کړه: "په غزه کې جګړه باید ودرېږي، او په منځني ختیځ کې باید یوه تلپاتې او عادلانه سوله رامنځته شي."

په نورو ځایونو کې لاریونونه

په اسپانیا کې د ۲۱ فعالانو له راستنېدو وروسته، لسګونو زرو کسانو د هېواد په بېلابېلو برخو کې په غزه کې د اسرائیل د نسل وژنې پر وړاندې لاریونونه وکړل.

د یکشنبې په ورځ لسګونه زره کسان د پاکستان سوداګریزې پلازمېنې کراچۍ زړه ته راووتل ترڅو پر غزې د اسرائیل د برید دوهمه کلیزه ولمانځي او له نړیوالې ټولنې یې وغوښتل چې په دې کلابنده سیمه کې د روانې نسل وژنې په اړه خپله چوپتیا ماته کړي.

نارینه، ښځې او ماشومان چې د فلسطین درې رنګه بیرغونه یې رپول او دودیزه چپیه (کوفیه) یې پر سر وه، د ښار اصلي واټ، شارع فیصل، ته راوتلي وو، چې دا په پاکستان کې د لاریونونو د نوې څپې یوه برخه وه.

دا لاریون د جماعت اسلامي (JI) له خوا، چې د هېواد یو مهم دیني-سیاسي ګوند دی، تنظیم شوی و. دې ګوند په وروستیو میاشتو کې په ټول پاکستان کې لسګونه لاریونونه رهبري کړي دي.

په استانبول او انقره کې هم خلکو په دې کلابنده شوې سیمه کې د اسرائیل د عام وژنې پر وړاندې لاریونونه وکړل او د ترکیې او فلسطین بیرغونه یې ورپول.