په جرمني کې غلو د یو بانک نه شاوخوا ۳۵ میلیونه ډالره نغدې پیسې او قیمتي توکي غلا کړي دي.
پولیس وايي، د ګیلسنکرشن په لویدیځ ښار کې غلو د غلا پر مهال تر ۳۰۰۰ ډېر د امانت صندوقونه مات کړي دي.
پولیسو ویلي، غلو د یوې لویې برمې په کارولو سره د جرمني د یوه سپما بانک د خزانې خونې ته ځانونه رسولي او د شاوخوا ۳۰ میلیونه یورو (۳۵ میلیونه ډالره) په ارزښت نغدې پیسې، سره زر او ګاڼې یې غلا کړي دي.
په داسې حال کې چې جنایتکاران لا هم په تیښته بریالي دي، د سه شنبې په ورځ په سلګونو اندېښمنو بانکي مشتریانو د څانګې بهر راټول شوي وو او د معلوماتو غوښتنه یې کوله، خو د پولیسو له خوا لرې وساتل شول.
د پولیسو په وینا، غلو د یوه پارکینګ له ګراجه د سپارکاسه (Sparkasse) سپما بانک د ځمکې لاندې خزانې خونې ته د برمه کولو له لارې لاره موندلې ده.
پلټونکي شک لري چې دې ډلې د اونۍ ډېره برخه دننه تېره کړې او د امانت صندوقونه یې مات کړي دي.
دا غلا وروسته له هغه څرګنده شوه چې د دوشنبې په لومړیو ساعتونو کې د اور د خطر زنګ ووهل شو او بېړنیو خدماتو دغه سوری وموند.
شاهدانو ویلي چې د شنبې او یکشنبې ترمنځ شپه یې د پارکینګ په زینو کې څو کسان لیدلي چې لویې کڅوړې یې لېږدولې.
د امنیتي کامرو په ویډیوګانو کې دا هم لیدل شوي چې د دوشنبې په سهار وختي یو تور رنګه آوډي آر ایس ۶ (Audi RS 6) موټر له پارکینګ څخه وځي چې دننه یې مخ پټي کسان ناست وو.
پولیسو ویلي، د موټر لایسنس پلیټ مخکې د هانوور په ښار کې غلا شوی و.
د پولیسو یوه ویاند فرانس پرس خبري اژانس ته ویلي چې دا غلا "په حقیقت کې خورا مسلکي توګه ترسره شوې" او هغه یې د "اوشینز الیون" (Ocean's Eleven) فلم له غلا سره تشبیه کړې ده.
هغه وویل: "د دې پلان او ترسره کولو لپاره باید ډېره مخکینۍ پوهه او/یا ډېره جرمي انرژي کارول شوې وي."
پولیسو ویلي چې تر ۳۰۰۰ ډېرو صندوقونو په اوسط ډول د ۱۰،۰۰۰ یورو بیمه درلوده، او له همدې امله یې د زیان اندازه شاوخوا ۳۰ میلیونه یورو اټکل کړې ده.
څو تنو قربانیانو پولیسو ته ویلي چې د دوی زیانونه د امانت صندوقونو له بیمه شوي ارزښت څخه ډېر زیات دي.
د پولیسو ویاند وویل چې "ناراضه مشتریان" د بانک څانګې بهر وو، کومه چې کارکوونکو ته د ګواښونو له امله د امنیتي دلایلو پر بنسټ نه وه پرانیستل شوې.
هغه زیاته کړه: "موږ لا هم په سیمه کې یو او وضعیت څارو،" او زیاته یې کړه چې "وضعیت د پام وړ ارام شوی دی."
