د امریکا ولسمشر د فرانسې ، بریتانیا او کاناډا د مشرانو لخوا د سپټمبر په میاشت کې د فلسطین د دولت د په رسمیت پیژندو د پلان او ارادې په اړه ژوره ناخوښي ښودلې ده.
د سپینې ماڼۍ ویاندې کارولین لیویټ وویل چې د امریکا ولسمشر ډونالډ ټرمپ د فرانسې، بریتانیا او کاناډا د مشرانو له هغې پرېکړې ناخوښي څرګنده کړې چې دوی پلان لري په سپټمبر کې د فلسطین دولت په رسمیت وپېژني.
د لیویټ په وینا، ټرمپ اوس د دې هڅو په اړه ډېر انتقادي نظر لري او باور لري چې دا د حماس لپاره د انعام ورکولو په معنا ده، په داسې حال کې چې حماس د اوربند او د ټولو یرغمل شویو کسانو د خوشې کولو په وړاندې اصلي خنډ دی.
د واشنګټن د نږدې متحدینو وروستیو اعلانونو د امریکا د ولسمشر دریځ د دې ګام په وړاندې لا سخت کړی دی.
په داسې حال کې چې ټرمپ د کاناډا پرېکړه وغندله چې په سپټمبر کې د ملګرو ملتونو په غونډه کې د فلسطین د دولت په رسمیت پېژندلو نیت لري، هغه د فرانسې ولسمشر ایمانویل مکرون او د بریتانیا لومړي وزیر کییر سټارمر په اړه لږ نرم نظر څرګند کړ.
هغه د مکرون پرېکړه بې ارزښته وبلله، کومه چې تېره اوونۍ نورو هېوادونو ته د ورته ګامونو د اخیستلو لپاره لاره هواره کړه، او ویې ویل چې دا بیان "مهم نه دی" او "ډېر وزن نه لري."
سټارمر په دې اوونۍ کې وویل چې بریتانیا به په سپټمبر کې د فلسطین دولت په رسمي ډول په رسمیت وپېژني، پرته له دې چې اسرائیل د پام وړ ګامونه پورته کړي، په شمول د غزې په تړاو د اوربند منل.
‘د ځنډ لپاره ځای نشته’
کله چې له ټرمپ څخه د بریتانیا د پرېکړې په اړه د سکاټلنډ له سفر او له سټارمر سره د خبرو وروسته پوښتنه وشوه، هغه وویل: "زه په دې ډله کې نه یم، په رښتیا سره."
کاناډا په دې اوونۍ کې وروستی لویدیځ هېواد شو چې د فلسطین د دولت په رسمیت پېژندلو نیت یې اعلان کړ.
د کاناډا لومړي وزیر مارک کارني په خپل اعلان کې وویل: "په غزه کې د بشري کړاو کچه د زغملو وړ نه ده."
هغه زیاته کړه: "د ملکي وګړو ژور کړاو د سولې، امنیت او د انساني ژوند د کرامت د ملاتړ لپاره د همغږې نړیوالې هڅې لپاره د ځنډ ځای نه پرېږدي."
دا پرمختګ په داسې حال کې رامنځته کېږي چې د ملګرو ملتونو عمومي منشي انتونیو ګوتریش وویل چې د فلسطین دولت په رسمیت پېژندل "حق دی، انعام نه دی."
په همدې حال کې، د فلسطین مرستیال ولسمشر حسین الشیخ د کاناډا، مالټا او پرتګال د هغو اعلانونو هرکلی کړی چې د سپټمبر په میاشت کې د ملګرو ملتونو د عمومي غونډې په جریان کې د فلسطین د دولت په رسمي ډول په رسمیت پېژندلو نیت لري.
د وفا د راپور له مخې، الشیخ د دغو درېیو هېوادونو دا تاریخي نوښتونه وستایل او یادونه یې وکړه چې دوی د نړیوالو ملاتړ کوونکو په زیاتېدونکي شمېر کې شاملېږي چې د دوه دولتونو د حل لارې او د فلسطین د خلکو د حقونو د تایید ملاتړ کوي.
الشیخ هیله څرګنده کړه چې دغه اعلامیې به په "ملموسو ګامونو" بدل شي چې د دوامداره سولې او د فلسطین د دولت نړیوال مشروعیت ته لاره هواره کړي.
