ویل شوي چې دا برید د امریکا د هغې حملې په غبرګون کې شوی چې تېره شپه یې پر 'قشم' ټاپو کړې وه او له امله یې د یوې کورنۍ ۳ غړي وژل شوي وو.
د ایران د سپاه پاسداران ځواکونو ادعا کړې چې پر قشم ټاپو د امریکا د برید په غچ کې یې په اردن کې د دغه هېواد د 'موفق السلطي' پر هوايي اډې بالیسټیک توغندیز برید کړی او ۳ 'ایف-۳۵' (F-35) الوتکې یې په بشپړه توګه له منځه وړي دي.
د سپاه پاسداران د لیکلې اعلامیې له مخې، ایران په اردن کې د امریکا پر دغې هوايي اډې برید ترسره کړی دی. په اعلامیه کې ویل شوي چې دا برید د امریکا د هغې حملې په ځواب کې شوی چې تېره شپه یې په قشم ټاپو کې د یوې کورنۍ ۳ غړي وژلي وو.
ادعا شوې چې د موفق السلطي په هوايي اډه کې د مېشتو ایف-۳۵ الوتکو څخه ۳ یې په بشپړه توګه ویجاړې شوي، ۳ نورې زیانمنې شوي او یو شمېر امریکايي سرتېري او تخنیکي پرسونل وژل شوي دي.
په اعلامیه کې دا هم راغلي چې نن سهار د خوزستان ولایت په 'بندر امام خمیني' کې د امریکا یوه بې پیلوټه الوتکه (ډرون) پېژندل شوې او ویشتل شوې ده.
بل لور ته، د اردن پوځ اعلان کړی و چې نن سهار یې د ایران لخوا توغول شوي ۵ هغه توغندي پېژندلي او شنډ کړي دي چې د دغه هېواد خاوره یې په نښه کړې وه.
