د وال سټریټ ژورنال د راپور له مخې، دغه ۳۰ کلن تړون امریکایي شرکتونه د سعودي عربستان د اټومي بنسټونو په مرکز کې ځای پر ځای کوي او په ورته وخت کې پر دغو بنسټونو د متحده ایالاتو څارنه هم پراخوي.
د وال سټریټ ژورنال د خبر له مخې، د متحده ایالاتو ولسمشر ډونالډ ټرمپ په رسمي ډول یو تاریخي تړون تایید کړ چې سعودي عربستان ته به د ملکي اټومي پروګرام د پراختیا لاره هواره کړي.
ورځپاڼې د امریکايي چارواکو په حواله ویلي چې د دغه ۳۰ کلن تړون ارزښت د لسګونو میلیاردونو ډالرو په شاوخوا کې اټکل کېږي.
د راپور له مخې، دا تړون امریکايي شرکتونو ته د سعودي عربستان د اټومي زیربناوو په پراختیا کې مرکزي رول ورکوي او هدف یې له دې برخې څخه د نورو بهرنیو سیالانو لیرې ساتل دي.
د نوي تړون یوه له مهمو برخو څخه دا ده چې که واشنګټن او ریاض په ګډه بیاکتنه کې پرېکړه وکړي چې د یورانیمو د غني کولو د یوې کارخانې جوړول اړین دي، نو امریکایي شرکتونه به په سعودي عربستان کې دغه ډول تاسیسات جوړوي.
د راپور پر بنسټ، دا تړون به متحده ایالاتو ته فرصت ورکړي چې د سعودي عربستان اټومي اهداف له نږدې وڅاري. د ټرمپ د ادارې چارواکي وايي دا کار مرسته کوي چې د دغه پروګرام د وسلو جوړولو په موخه د کارولو مخه ونیول شي.
تمه کیږي چې دا تړون به په راتلونکو ورځو کې د بیاکتنې لپاره د متحده ایالاتو کانګرس ته واستول شي، چیرته چې احتمال لري په منځني ختیځ کې د اټومي وړتیاوو د پراختیا په اړه د اندېښمنو وکیلانو له مخالفت سره مخ شي.
