د ایران د بهرنیو چارو وزیر وايي چې د سولې خبرې د پاکستان په ملاتړ پرمخ روانې دي او له واشنګټن او ابوظبۍ څخه یې وغوښتل چې د "بدغواړو" له خوا په ژور (کړکېچ) کې له ښکېلېدو ډډه وکړي.
د ایران د بهرنیو چارو وزیر عباس عراقچي ویلي چې «سیاسي بحران هیڅ نظامي حل لاره نه لري»، او امریکا او متحده عربي اماراتو ته یې د هرمز په تنګي کې د کړکېچ د نور زیاتېدو په اړه خبرداری ورکړی دی.
عراقچي پر خپله ایکس (X) پاڼه لیکلي: "په هرمز کې پیښو دا روښانه کړه چې یو سیاسي بحران نظامي حل نه لري." هغه زیاته کړه: "لکه څنګه چې خبرې اترې د پاکستان په مخلصانه هڅو سره پرمخ روانې دي، امریکا باید محتاطه وي چې د بدغواړو له خوا یو ځل بیا دلدل ته کش نه شي. متحده عربي امارات هم باید ورته پام وکړي."
عراقچي همدارنګه له تنګي څخه د سوداګریزو کښتیو د بدرګې لپاره د واشنګټن د «آزادۍ پروژه» پلان رد کړ او ویې ویل: «د آزادۍ پروژه په اصل کې د بندښت پروژه ده.»
دا څرګندونې په داسې حال کې شوي چې د ډنمارک ټرانسپورتي ستر شرکت «میرسک» ویلي، د دوی یوه کښتۍ چې د امریکا تر بیرغ لاندې یې موټر لېږدول، د هرمز له تنګي تیره شوې ده.
ایران د دوشنبې په ورځ پر متحده عربي اماراتو غچ اخیستونکي بریدونه پیل کړل. دا نوي توغندیز او ډرون بریدونه له هغې وروسته لومړنۍ پیښې وې چې تیره میاشت د ایران او امریکا ترمنځ اوربند نافذ شوی و.
متحده عربي اماراتو وروسته له ایران څخه د توغندیو او ډرون الوتکو د څلورمې څپې خبر ورکړ او ویې ویل چې د دوی هوايي دفاعي سیسټمونو ۱۵ توغندي او ۴ ډرون الوتکې شنډې کړې دي.
همدارنګه د فجیره په نفتي صنعتي سیمه کې، چې د متحده عربي اماراتو په ختیځ ساحل کې د انرژۍ یو مهم مرکز دی، له ایران څخه د توغول شوي ډرون د لګیدو له امله اور لګیدلی دی.
سیمه ییز تاوتریخوالی وروسته له هغه خورا زیات شو کله چې امریکا او اسرائیل د فبرورۍ په ۲۸مه پر ایران بریدونه وکړل. دې کار د اسرائیل او په خلیج کې د امریکا د متحدینو په وړاندې د تهران غبرګون راوپاراوه او د هرمز تنګي د تړل کېدو لامل شو.
د اپریل په ۸مه د پاکستان په منځګړیتوب یو اوربند رامنځته شو، خو په اسلام اباد کې خبرو اترو کومه تلپاتې هوکړه ونه لرله. دغه اوربند وروسته د امریکا د ولسمشر ډونالډ ټرمپ لخوا پرته له کومې ټاکلې نېټې وغځول شو.
