د اوکراین ولسمشر ولادیمیر زیلنسکي ویلي چې کیف د روسیې د یاروسلاویل (Yaroslavl) یپه سیمه کې د تېلو په یوه تاسیساتو برید کړی، چې د مسکو د تېلو د زېرمو لپاره یو مهم مرکز بلل کیږي.

زیلنسکي د یکشنبې په ورځ په اېکس (پخواني ټویټر) کې په یو پوسټ کې، وویل چې اوکرایني ځواکونو د روسیې د تولا په سیمه کې د "ازوټ" کیمیاوي فابریکه هم په نښه کړې ده. هغه دا فابریکه د مسکو د چاودیدونکو توکو د تولید د وړتیا لپاره حیاتي وبلله.

هغه وویل چې د شنبې له ماښام راهیسې د روسیې په شپږو هوایي ډګرونو کې پر الوتنو محدودیتونه لګول شوي او د روسیې په ۲۸ سیمو کې د هوایي بریدونو خبرداری  ورکړل شوی دی. زیلنسکي دا ادعا هم وکړه چې اوکرایني ځواکونو د روسیې تر کنټرول لاندې اوکرایني سیمو کې په پوځي لوژستیکي اهدافو هم بریدونه کړي دي.

هغه زیاته کړه: "اوکراین د روسیې په وړاندې د خپلو اوږد واټن بندیزونو پلان او د جګړې د پای ته رسولو په اړه د روسیې د انکار په ځواب کې، د ټاکل شویو منځني واټن بریدونو دندې ترسره کوي."

نوموړي وویل چې کیف مسکو ته "د مذاکراتو هر ډول بڼه" وړاندې کړې وه، خو د روسیې ځواب "د تېري دوام او د هغه د پراخولو هڅې" وې. زلنسکي وویل: "دا په منطقي ډول مانا لري چې جګړه بېرته خپل پیل ځای (روسیې) ته ورګرځي."

د ډرون "پراخ" برید

په یو جلا بیان کې، زلنسکي روسیه تورنه کړه چې په تېره یوه اونۍ کې یې پر اوکراین ۱۹۲۰ بریدګر ډرونونه، ۱۷۹۰ لارښود شوي بمونه او ۱۷ ډوله توغندي توغولي دي.

بلخوا، روسي چارواکو وویل چې په یاروسلاویل سیمه کې د اوکراین د ډرونونو په یو "پراخ" برید کې د سون توکو صنعتي زېرمې لګېدلي دي. د یادې سیمې والي، میخایل ایورایف، پر خواله رسنیو وویل چې د مسکو په لور ترافیک بند شوی او بیړنۍ ډلې د اور مړولو په حال کې دي.

د تولا والي، دمیتري میلایف، په ټیلیګرام کې ولیکل چې د ویشتل شویو اوکرایني ډرونونو ټوټې په "نووموسکوفسک" ښار کې د یوې صنعتي تصدۍ په انګړ کې لوېدلي دي. هغه وویل چې بیړني خدمتونه په کار بوخت دي او د اوښتي زیان اندازه معلومیږي.

د روسیې د انرژۍ پر زیربناوو د اوکراین بریدونه په وروستیو میاشتو کې ډېر شوي دي. د جون په پیل کې، زلنسکي ادعا کړې وه چې اوکرایني ځواکونو د جنوري او مې میاشتو ترمنځ د روسیې ۱۵ د تېلو تصفیه خانې ویشتي، او ادعا یې وکړه چې د مې تر میاشتې پورې د روسیې د تېلو د تصفیې نږدې ۴۰ سلنه اصلي ظرفیت له کاره لوېدلی و.