قاضي لیو سوروکین موندلې چې دا پالیسي د فدرالي اداري اجرااتو قانون او د متحده ایالاتو له اساسي قانون دواړو څخه سرغړونه کوي، او د دې اقدام په وړاندې یې یوه مهمه پرېکړه صادره کړه.

د امریکا یوه فدرالي قاضي د ولسمشر ډونالډ ټرمپ اداره د هغو ګمارونکو په وړاندې د ۱۰۰،۰۰۰ ډالرو فیس له لګولو منع کړې چې د لوړ مهارت لرونکو بهرنیو کارګرانو لپاره د ویزې غوښتنلیکونه سپاري.

د سیمه ییزې محکمې قاضي لیو سوروکین په هغې دعوه کې چې د ۲۰ ډیموکرات پلوه ایالتونو لخوا شوې وه، پرېکړه وکړه چې دې اقدام د مالیې لګولو هغه واکونه غصب کړي چې د کانګرس په لاس کې دي او د H-1B ویزو لپاره دا فیس یو غیرقانوني ټکس (مالیه) ده.

سوروکین د دوشنبې په ورځ په خپلې ۴۲ مخیزې پرېکړې کې ولیکل: "د ۱۰۰،۰۰۰ ډالرو تادیې ماهیت او پلي کېدل ښيي چې دا یو ټکس دی، پرته له دې چې دا تادیه په کوم نوم یادیږي." هغه زیاته کړه: "ولسمشر په H-1B عریضو باندې د مالیې لګولو هیڅ واک یا ورسپارل شوی صلاحیت نه درلود."

د دسمبر په میاشت کې په یوه بله جلا قضیه کې یو بل فدرالي قاضي د ۱۰۰،۰۰۰ ډالرو دا فیس تایید کړی و، چې اوس پر دغې پرېکړې بیا کتنه روانه ده. دا دعوه د امریکا د سوداګرۍ خونې او د امریکا د پوهنتونونو د ټولنې لخوا، چې د ۶۹ څیړنیزو مرکزونو استازیتوب کوي، شوې وه.

کافي کورني استعدادونه نشته

ټرمپ د سپتمبر په میاشت کې د H-1B ویزې نوې پالیسي اعلان کړه او استدلال یې وکړ چې له دې سیسټم څخه ناوړه ګټه اخیستل کیږي ترڅو امریکايي کارګران په هغو کسانو بدل کړي چې په لږو پیسو کار کولو ته چمتو دي.

د H-1B فیس د ادارې لخوا د کډوالۍ په وړاندې د هغو پراخو محدودیتونو برخه ده چې د کډوالو په وړاندې یې یو ستر کمپاین پیل کړی دی.

متحده ایالات په کال کې د پچې اچونې (lottery) له لارې ۸۵،۰۰۰ H-1B ویزې ورکوي، چې نږدې درې پر څلورمه برخه یې د هند وګړو ته ورکول کیږي. تر دې وړاندې د H-1B ویزې فیس تر ۵،۰۰۰ ډالرو پورې و.

د ایلون مسک په ګډون د ټیکنالوژۍ برخې مخکښانو د H-1B ویزو د محدودولو په اړه خبرداری ورکړی و او ویلي یې وو چې متحده ایالات د ټیکنالوژۍ سکتور د مهمو دندو ډکولو لپاره په کور دننه کافي استعدادونه نه لري.