د امریکا ولسمشر ډونالد ټرمپ د یو افغان کډوال لخوا سپینې ماڼۍ ته نږدې د ملي ګارد پر سرتیرو د وسله وال برید نه وروسته  د افغان کډوالو د بیا څېړنې غوښتنه وکړه

د امریکا ولسمشر د واشنګټن برید "یو ترهګریز عمل" بللی او  پلازمینې  ته یې د ۵۰۰ نورو سرتېرو د استولو امر کړی دی.

د امریکا ولسمشر ډونالډ ټرمپ د بایډن ادارې پر مهال امریکا ته د راانتقال شوو ټولو افغان کډوالو د بیا څېړنې غوښتنه کړې. دا پریکړه وروسته له هغه  وشوه چې په واشنګټن کې د ملي ګارد پر سرتیرو برید کوونکی افغان کډوال تثبیت شو . ویل کیږي برید کوونکی افغان کډوال په ۲۰۲۱ کال کې امریکا ته راانتقال شوی وو.

د چهارشنبې په ورځ په یوه ویډیویي بیانیه کې، ټرمپ دغه ډزې "سپینې ماڼۍ ته څو قدمه لرې یو وحشیانه کمین ډوله برید" وباله او ویې ویل چې پر سرتېرو د شکرانې رخصتۍ په شپه "له نږدې واټنه" ډزې شوي دي.

هغه وویل: "دا ناوړه برید د شر، کرکې او ترهګرۍ عمل و. دا زموږ د ټول ملت پر وړاندې یو جرم و. دا د بشریت ضد جرم و."

ټرمپ زیاته کړه چې دا برید "یو ترهګریز عمل و" او ویې ویل چې د ملي ګارد پر وړاندې برید د امریکا لپاره "تر ټولو لوی ملي امنیتي ګواښ" دی.

هغه دا ادعا هم وکړه چې پخوانۍ ادارې "له ټولې نړۍ څخه ۲۰ میلیونه بې اسنادو بهرنیانو" ته له مناسبې څېړنې پرته هېواد ته د ننوتلو اجازه ورکړې وه.

هغه وویل امریکا باید "هر هغه بهرنی وګړی چې د بایډن د ولسمشرۍ پر مهال له افغانستانه داخل شوی، بیا وڅېړي" او ټینګار یې وکړ چې دا ډول پېښه "د زغملو وړ نه ده."

ټرمپ وویل: "موږ به د هغو کسانو لخوا چې باید زموږ په هېواد کې نه وي، پر قانون او نظم دا ډول برید ونه زغمو."

"امریکا به د ترهګرۍ په وړاندې تسلیم نه شي او موږ به اجازه ورنکړو چې له هغه ماموریت څخه راوګرځول شو چې زموږ سرتېرو په ویاړ سره ترسره کاوه."

ټرمپ وویل شکمن کس، چې سخت ټپي شوی، "له چټک او حتمي عدالت سره به مخ شي،" او زیاته یې کړه: "که هغه مرمۍ چې پرې لګېدلې، دا کار ونکړي، موږ به د دې وحشیانه برید عامل چټک او حتمي عدالت ته راکش کړو."

ولسمشر وویل چې له برید وروسته یې واشنګټن ډي سي ته د ۵۰۰ نورو سرتېرو د ځای پر ځای کولو لارښوونه هم کړې ده.

دغو ډزو په پلازمېنه کې سیاسي بحثونه ګرم کړي او د جرم او امنیت په اړه د ټرمپ پر تګلاره یې بیا تمرکز راجلب کړی، په شمول په ټول ښار کې د ملي ګارد د واحدونو پر شتون او ځای پر ځای کولو.