اردوغان د اسد وروسته د سوریې پرمختګ ستایلی او د ملي یووالي لپاره یې د دوامداره ملاتړ ژمنه وکړه
د تورکیې ولسمشر اردوغان د سوریې د ځمکنۍ بشپړتیا پر خوندیتوب او په دغه هېواد کې د ټولو پرګنو ترمنځ د ټولنیزې سولې پر ملاتړ د انقرې پر ژمنتیا یو ځل بیا ټینګار کوي.

د تورکیې ولسمشر رجب طیب اردوغان په تېر یو کال کې "سره له ټولو سختیو، ورانکارو هڅو او پارونو" د سوریایانو له خوا د شوي پرمختګ ستاینه وکړه.

ولسمشر رجب طیب اردوغان د دوشنبې په ورځ د تورکیې په ټولنیزه شبکه 'اېن‌سوسیال' (NSosyal) کې په یوه خپاره کړي پیغام کې، د ډسمبر د اتمې نېټې د انقلاب د لومړۍ کلیزې ستاینه وکړه، چې د هغه په وینا له کلونو ظلم، سترو قربانیو، ژورو کړاوونو او بې شمېره سختیو وروسته یې سوریایان ازاد کړل.

هغه زیاته کړه، چې د پخواني رژیم او ترهګرو ډلو په بریدونو کې شهیدان شوي کسان په رحمت سره یادوي او زیاته یې کړه: "د سوریې د ډسمبر د اتمې د ازادۍ په ورځ، زه ورور سوریایي ولس ته د تورکیې له زړه کومي سلامونه او خپله مینه وړاندې کوم."

د تورکیې ولسمشر همدارنګه ټینګار وکړ چې ترکیه به "د سوریې د ځمکنۍ بشپړتیا د ساتنې، په هېواد کې د ټولو پرګنو ترمنځ د ټولنیزې سولې په ټینګښت کې د مرستې، او په سیمه کې د سولې او ثبات د مرکز په توګه د دې هېواد د راڅرګندېدو لپاره ټول اړین ملاتړ ته دوام ورکړي."

اسد، چې نږدې ۲۵ کاله د سوریې مشر و، تېر ډسمبر روسیې ته وتښتېد او په دې سره یې د بعث ګوند رژیم، چې له ۱۹۶۳ کال راهیسې واکمن و، پای ته ورساوه. د شرع نوې انتقالي اداره په جنورۍ کې جوړه شوه.