د تورکیې جمهوریت د بهرنیو چارو وزیر هاکان فیدان وویل چې د امریکا او ایران ترمنځ خبرې اترې دا مهال درېدلي، خو باور لري چې تهران ښایي غیر رسمي ډیپلوماټیکو چینلونو ته چمتو وي.

فیدان وویل چې په سیمه کې د جګړې فضا د رسمي ډیپلوماسۍ پرمخ وړل ستونزمن کړي دي.

فیدان د شنبې په ورځ اسوشیټیډ پریس ته په خبرو کې وویل: "اوسني شرایط د ډیپلوماسۍ لپاره ډېر مناسب نه دي." هغه زیاته کړه چې ایرانیان له واشنګټن سره د اټومي خبرو پر مهال د برید له امله "د خیانت احساس کوي".

فیدان وویل: "زما په اند، دوی هر ډول معقولې پټې ډیپلوماسۍ ته چمتو دي."

د بهرنیو چارو وزیر فیدان ټینګار وکړ چې په سیمه کې د کړکېچ د زیاتېدو په حال کې، د تورکیې لومړیتوب له جګړې څخه ځان لرې ساتل دي.

فیدان وویل: "زه پوهیږم چې موږ لمسول کېږو او ولمسول به شو، خو زموږ موخه همدا ده." هغه زیاته کړه: "موږ غواړو له دې جګړې څخه بهر پاتې شو."

د نتنیاهو په مشرۍ اسرائیل د خپلو موخو لپاره 'دښمن ته اړتیا لري'

فیدان همداراز په سیمه کې د اسرائیلو پر سیاستونو نیوکه وکړه او استدلال یې وکړ چې د لومړي وزیر بنیامین نتنیاهو په مشرۍ اسرائیل په دوامداره توګه سیمه ییز لوبغاړي د ګواښ په توګه معرفي کوي.

د بهرنیو چارو وزیر فیدان وویل: "ترڅو چې نتنیاهو وي، (اسرائیل) به تل یو څوک د دښمن په توګه تعریفوي."

"ځکه دوی د خپلو موخو د پرمخ وړلو لپاره دې ته اړتیا لري. که ترکیه نه وي، نو له سیمې به بل کوم هېواد په نښه کړي."

فیدان پر اسرائیل تور ولګاوه چې د امنیت پر ځای د خاورې د ترلاسه کولو په لټه کې دی.

فیدان وویل: "هغه څه چې دوی یې په لټه کې دي امنیت نه، بلکې نوره خاوره ده." هغه زیاته کړه: "ترڅو چې دوی له دې فکر څخه لاس وانخلي، په منځني ختیځ کې به تل جګړه وي."