روسیه: پر وینزویلا د امریکا برید به د نړیوال اکثریت لخوا وغندل شي.
د روسیې د پارلمان د مشرانو جرګې (فدراسیون شورا) مرستیال کونسټنټین کوساچوف وویل، چې پر وینزویلا د امریکا بمباري به نړیوال اکثریت وغندي.
کوساچوف په خپل ټلګرام حساب کې په خپرو کړو څرګندونو کې پر وینزویلا د امریکا پر برید نیوکه وکړه او ډاډ یې څرګند کړ چې نړیوال اکثریت به د وینزویلا پر وړاندې له دې برید څخه په پرېکنده توګه ځان لرې کړي او هغه به وغندي.
سناتور کوساچوف زیاته کړه: "نړیوال اقلیت ته زړه بوږنونکي دردونه په تمه دي. دا بهیر به یا ارزښتونه او ګټې بېرته خپلو اصلي ځایونو ته راولي او یا به د ټرانس اټلانټیک اتحاد د جیوپولیټیکو ګټو په وړاندې ارزښتونه په نه ګرځېدونکي ډول له منځه یوسي."
- "د امریکا لخوا پیل شوې یوه بله جګړه"
د روسیې د فدراسیون شورا سناتور، الیکسي پوشکوف هم په خپل ټلګرام حساب کې په خپرو کړو څرګندونو کې، دې ته په اشارې سره چې ۲۰۲۶ کال په یوې نوې جګړې پیل شوی، وویل: "دا د امریکا لخوا پیل شوې یوه بله جګړه ده، سره له دې چې د هدف هېواد لخوا د امریکا امنیت ته هېڅ ګواښ هم نشته."
پوشکوف دې ته په اشارې سره چې پر وینزویلا برید په ۲۱مه پېړۍ کې د امریکا لخوا پیل شوې او پرمخ وړل شوې څلورمه جګړه ده، یادونه وکړه چې امریکا په ۲۰۰۱ کال کې په افغانستان، په ۲۰۰۳ کال کې په عراق او په ۲۰۱۱ کال کې په لیبیا کې جګړې پیل کړې وې.
سناتور پوشکوف خپل نظر داسې شریک کړ: "که د سوریې او اوکراین جګړې، چې امریکا پکې په غیر مستقیم ډول ښکېل ده، هم ور اضافه کړو، نو دا په دې ربع پېړۍ کې شپږمه جګړه کیږي. تر دې دمه (د امریکا ولسمشر ډونالډ) ټرمپ د کلنټن، بوش جونیر، اوباما او بایډن پر خلاف 'خپله' جګړه نه درلوده. اوس یې لري."
