امریکايي ځواکونو په ټول عراق کې له خپلو پاتې پوځي اډو څخه په وروستي ځل وتل پیل کړي دي؛ دغه ګام د امریکا له یرغل څخه څه باندې دوه لسیزې وروسته د راتلونکو امنیتي ترتیباتو په اړه پوښتنې راپورته کړې دي.
د ټرمپ اداره له عراق څخه د وتلو دغه بهیر داسې مهال عملي کوي چې په ۲۰۲۴ کال کې د ولسمشر جو بایډن په دوره کې پرې هوکړه شوې وه، چې لا هم په سیمه کې د واشنګټن او تهران ترمنځ تقابل او کړکېچ روان دی.
په دغه هېواد کې د دوو لسیزو اشغال په ترڅ کې له ۴۵۰۰ څخه زیات امریکايي پوځیان وژل شوي دي.
امریکايي ځواکونه په ۲۰۰۳ کال کې د امریکا په مشرۍ د جګړې پر مهال عراق ته ننوتل او د ۲۰۱۱ کال په پای کې له وتلو وړاندې، د "بغاوت ضد عملیاتو" په نوم څو کاله هلته پاتې شول.
دا ځواکونه تر دریو کلونو په کمه موده کې د ۲۰۱۴ او ۲۰۱۷ کلونو ترمنځ د داعش د له منځه وړلو د عملیاتو پر مهال د عراقي ځواکونو د ملاتړ لپاره بېرته ورستانه شول.
په عراق کې د امریکايي ځواکونو تلفات د افغانستان په پرتله (چې په ۲۰۲۱ کال کې له ګډوډۍ په ډک وتلو سره پای ته ورسېده) نږدې دوه برابره وو.
