ډونالډ ټرمپ له مهمو منځمهاله ټاکنو وړاندې وویل چې پر ایران د امریکا روانه جګړه د متحده ایالاتو لپاره یوه "ناچیزه او معمولي موضوع" ده.

ټرمپ د جمعې په ورځ په بیضوي (Oval Office) دفتر کې له خبریالانو سره د وینس د څرګندونو په اړه د خبرو پر مهال وویل: "ډېر کسان دې ته جګړه نه وايي. زه دې ته پوځي نښته وایم، ځکه دا زموږ لپاره یوه ناچیزه موضوع ده."

ټرمپ زیاته کړه: "دا کومه لویه موضوع نه ده. موږ وینزویلا حل کړه، دا به هم حل کړو."

امریکا د فبروري په ۲۸مه له اسرائیل سره یوځای پر ایران برید وکړ؛ په دغو بریدونو کې مذهبي مشر علي خامنه يي، د حکومت نور لوړپوړي چارواکي او په سلګونو ملکي وګړي په لنډ وخت کې ووژل شول.

خو ایران د هرمز تنګي د کنټرول په ترلاسه کولو سره سمدستي غبرګون وښود او په خلیج کې د امریکا پر متحدو عربي هېوادونو یې د توغندیو او ډرون بریدونو باران جوړ کړ. دې بریدونو د هغو تېلو لرونکو هېوادونو اعتبار او ثبات زیانمن کړ چې په ډېرې سختۍ یې ترلاسه کړی و.

ټرمپ: "موږ وینزویلا ونیوله"

دا جګړه چې شپږ میاشتې یې وشوې او پکې ۱۸ امریکایي سرتېري او د ښځو او ماشومانو په ګډون په زرګونو ایرانیان ووژل شول، په دغه ستراتیژیکه اوبلاره  کې د بېړیو په تګ راتګ کې د تهران له خوا د ستونزو رامنځته کولو له امله له یو ډول بن بست سره مخ شوې ده.

خو داسې ښکاري چې د ټرمپ اداره هڅه کوي دا نښته کمه وښيي، ځکه د تېلو د بیو لوړېدل د دې لامل کېدای شي چې جمهوري غوښتونکي د نوامبر په منځمهاله ټاکنو کې په کانګرس کې خپل اکثریت له لاسه ورکړي.

ټرمپ وویل چې امریکا "وخت ناوخته بریدونه" کړي، خو "فعلاً جګړه نه کوي."

ټرمپ یو ځل بیا خپله دا ادعا تکرار کړه چې امریکا په عملي ډول د هرمز تنګی کنټرولوي او د ایران پوځ یې تر ډېره کمزوری کړی دی. د امریکا ولسمشر وویل: "هغه څه چې موږ کړي، د باور وړ نه دي. موږ وینزویلا ونیوله او په اصل کې مو ایران هم نیولی دی."

سره له دې چې ۱۸ امریکایي سرتېري وژل شوي، د جګړې "ناچیزه" بللو له امله ټرمپ تر فشار لاندې راغی او په غوسه شو؛ هغه د ایران جګړه په ویتنام او افغانستان کې د امریکا له کلونو جګړو سره پرتله کړه.

ټرمپ وویل: "دا مهمه نه ده چې تاسو ورته څه نوم ورکوئ. مهمه دا ده چې موږ لویه بریا ترلاسه کړې. موږ د ایران د اټومي وسلو ترلاسه کولو مخه نیولې ده."