د پاکستان په شمال لوېدیځ کې د پوځي عملیاتو له وېرې د شاوخوا ۷۰ زره کسانو د کډه کیدو ادعا شوې ده.

 د پاکستان په شمال لوېدیځ خیبر پښتونخوا ایالت کې، ادعا شوې چې شاوخوا ۷۰ زره کسان د احتمالي پوځي عملیاتو له وېرې له سیمې تښتېدلي دي.

د خیبر پښتونخوا ایالت اړوند د تیراه درې چارواکو او اوسېدونکو ویلي، چې کډه شوي ډېری ښځې او ماشومان دي، شاوخوا ۷۰ زره کسان د پاکستاني طالبانو (TTP) پر وړاندې د پوځي عملیاتو د پیلېدو له وېرې کډوال شوي دي.

له سیمې څخه کډوالي وروسته له هغه پیل شوه چې د جوماتونو له لاوډسپیکرونو څخه د تیراه اوسېدونکو ته غږ وشو چې د احتمالي جګړو د مخنیوي لپاره دې د جنورۍ تر ۲۳مې پورې سیمه پرېږدي.

د خیبر پښتونخوا ایالت په باړه او نږدې ښارګوټو کې له تیراه څخه په موټرو کې راغلي کورنۍ لیدل شوي.

د سیمه ییزې ادارې یوه چارواکي او د مرستندویه چارو څارونکي طلحه رفیق عالم وویل، چې تر اوسه له تیراه څخه، چې شاوخوا ۱۵۰ زره نفوس لري، ۱۰ زره کورنۍ یعنې ۷۰ زره کسان ثبت  شوي او د نوم لیکنې وروستۍ نېټه له ۲۳ جنورۍ څخه ۵ فبرورۍ ته غځول شوې ده.

عالم وویل، چې د روانې کډوالۍ لامل "د امنيتي وضعيت خرابېدل" دي او زیاته یې کړه چې کله امنیتي وضعیت ښه شي، یاد کسان به وکولای شي بېرته تیراه ته ستانه شي.

له سیمې څخه یوه کډوال شوي کس، وویل چې د چارواکو له خوا د سیمې د خالي کولو له امر وروسته یې له خپلې مېرمنې او څلورو ماشومانو سره ښارګوټی پرېښود.

هغه  وویل، چې په وروستیو اونیو کې په کلیو کې د هاوان مرمۍ لګېدلي، چې له امله یې یوه ښځه وژل شوې او څلور ماشومان ټپیان شوي دي.

هغه  زیاته کړه: "د کلي مشرانو موږ ته وویل چې کلی پرېږدئ. هغوی موږ ته مشوره راکړه چې خوندي ځایونو ته کډه شو."

د پاکستان د دفاع وزیر دا ادعاوې رد کړې

د پاکستان د دفاع وزیر خواجه محمد اصف په یوه بیان کې دا ادعاوې رد کړې او ویې ویل چې په سیمه کې اوسمهال کوم پوځي عملیات نه روان دي او نه هم د پیلولو پلان شته.

اصف ادعا وکړه چې له سیمې څخه کډوالي د پاکستاني طالبانو (TTP) پر وړاندې د پوځي عملیاتو د احتمال له امله نه، بلکې د سخت ژمي او نامناسبې هوا له امله ده.

د ۲۰۲۵ کال په اګست میاشت کې هم د خیبر پښتونخوا ایالت په باجوړ سیمه کې د TTP پر وړاندې د پوځي عملیاتو له پیل وروسته سلګونه زره کسان له سیمې تښتېدلي وو.

د پاکستان د ترهګرۍ ستونزه

په پاکستان کې وسله وال بریدونه په ځانګړي ډول په خیبر پښتونخوا او بلوچستان ایالتونو کې ډېر دي.

په دواړو ایالتونو کې هغه وسله والې ډلې چې د پښتنو او بلوڅو قومونو د حقونو د دفاع ادعا کوي، د پاکستان پر امنیتي ځواکونو او ملکي وګړو بریدونه کوي.

اسلام اباد ادعا کوي چې پاکستاني طالبان (TTP) په افغانستان کې ځای پر ځای دي او له هغه ځایه خپل بریدونه تنظیموي، خو د افغانستان حکومت دا ادعاوې ردوي.

په بلوچستان کې بیا د بلوڅو د ازادۍ پوځ (BLA) بریدونه د پام وړ دي. BLA غواړي چې بلوچستان ایالت له پاکستان څخه جلا شي او بلوڅ ولس پر دغه سیمه واکمن شي.