پاکستاني پولیس وايي، د شنبې په ورځ د پاکستان په شمال لوېدیځ کې پر یوې امنیتي پوستې موټر بم برید وشو او وروسته پر هغو ځواکونو هم برید وشو چې د پېښې ځای ته د مرستې لپاره روان وو.
د وزارت په اعلامیه کې راغلي: "د پېښې په اړه هر اړخیزې څېړنې، راټول شوي شواهد او تخنیکي استخبارات ښيي چې د دغه برید پلان په افغانستان کې مېشتو ترهګرو جوړ کړی و."
د افغانستان د حکومت مرستیال ویاند حمدالله فطرت رویټرز ته وویل چې دوی دا مهال په دې اړه تبصره نه لري.
اسلام اباد تل پر کابل تور پورې کړی چې هغو وسله والو ته یې پناه ورکړې چې د پاکستان پر ضد د افغانستان خاوره کاروي، خو طالبانو دا تورونه رد کړي او د پاکستان ناامني یې د دغه هېواد کورنۍ موضوع بللې ده.
په اعلامیه کې ویل شوي چې د افغانستان یو لوړپوړی ډیپلومات د پاکستان د بهرنیو چارو وزارت ته غوښتل شوی او د دغې پېښې په اړه ورته یو سخت احتجاجي لیک سپارل شوی دی.
اعلامیه زیاتوي: "د افغان طالبانو رژیم ته په غوڅه توګه خبر ورکړل شوی چې که دغو ترهګرو ډلو ته پناه ورکولو ته دوام ورکړي، نو پاکستان به د خپل ملي امنیت او د خپلو وګړو د خوندیتوب او ساتنې په برخه کې هیڅ ډول جوړجاړی ونه کړي."
د وسله والو بریدونو دا لړۍ کولی شي د افغانستان او پاکستان پر پوله نښتې یو ځل بیا را ژوندۍ کړي. د روان کال د فبرورۍ په میاشت کې هم د دواړو هېوادونو ترمنځ سختې نښتې شوې وې او پاکستان په افغانستان کې دننه هوایي بریدونه کړي وو، چې اسلام اباد یې د وسله والو د پټنځایونو په نښه کول بللي وو.
