د لبنان ولسمشر جوزف عون وایي، حزب الله باید وسلې تسلیم کړي.
د لبنان ولسمشر جوزف عون پداسې حال کې په سیاسي ډلو غږ وکړ چې د وسلو د دولتي کنټرول ملاتړ وکړي چې د هیواد د بیا رغونې په برخه کې د مرستو د ترلاسه کولو په مسئله کې د امریکا د سختو فشارونو لاندې دی.
د لبنان ولسمشر جوزف عون ویلي چې د لبنان سیاسي ګوندونه باید له فرصت څخه ګټه پورته کړي او خپلې وسلې ژر تر ژره وسپاري.
عون د پنجشنبې په ورځ د پوځ د ورځې په مناسبت یوه وینا کې وویل: "بیروت غوښتنه کوي چې د لبنان د دولت واک باید پر ټول قلمرو وغځول شي، د حزب الله په ګډون ټولې وسله والې ډلې باید خپلې وسلې پر مځکه کیږدي او پوځ ته يي وسپاري."
د هغه دا څرګندونې وروسته له هغې شوې چې د سه شنبې په ورځ د کابینې غونډه کې د لبنان د وسلو انحصار او د حزب الله د بې وسلې کېدو په اړه یو تود داخلي او نړیواله بحث وشو.
عون زیاته کړه: "دا د ټولو سیاسي ډلو دنده ده چې له دې تاریخي فرصت څخه پرته له ځنډه ګټه واخلي او هڅه وکړي چې وسلې یوازې د پوځ او امنیتي ځواکونو په اختیار کې وي، نه د بل چا."
د رویټرز د راپور له مخې، امریکا پر لبنان فشار راوستی چې د حزب الله د بې وسلې کولو په اړه دې یوه رسمي پرېکړه د کابینې له لوري تصویب کړي، مخکې له دې چې خبرې بیا پیل شي.
امریکا ویلي چې یوازې هغه وخت به د لبنان د بیارغونې ملاتړ وکړي او پر اسرائیلي پوځ به د بریدونو د درولو فشار راوړي، چې حزب الله په بشپړ ډول په ټول لبنان کې بې وسلې شي.
عون وویل، واشنګټن ته یوه طرحه وړاندې شوې ، چې راتلونکې اوونۍ به کابینې ته وړاندی شي. پدې طرحه لیکل شوي چې اسرائیل باید پر لبنان بریدونه بند کړي، او له هغو پوستو څخه ووځي چې د هېواد په جنوبي برخه کې یې نیولي، او ورسره حزب الله خپلې وسلې د لبنان ملي پوځ ته وسپاري.
دغه طرحه غواړي د لسو کلونو لپاره هر کال یو میلیارد ډالر د پوځ او امنیتي ځواکونو د ملاتړ لپاره ترلاسه کړي، او پکې دا هم شامل دي چې د روان کال وروستیو کې به د بیارغونې د ملاتړ لپاره یو نړیوال کنفرانس جوړ شي.
حزب الله د وسلو له تسلیمېدو انکار کوي
د لبنان د حزب الله مشر، شیخ نعیم قاسم، د چهارشنبې په ورځ وویل چې د بې وسلې کېدو غوښتنې یوازې د اسرائیلو په ګټه دي.
قاسم په یوه تلویزیوني وینا کې وویل: "هغه کسان چې د وسلو د تسلیمېدو غوښتنه کوي، په اصل کې یې اسرائیلو ته د سپارلو غوښتنه کوي... موږ به اسرائیلو ته تسلیم نه شو."
هغه زیاته کړه: "بې وسلې کېدل اوس لومړیتوب نه لري؛ لومړیتوب بیارغونه او د تېري پای ته رسول دي."
حزب الله تیر کال د اسرائیلو سره د جګړې څخه سخت زیانمن شو، چې پکې د دې ډلې ډېری مشران له منځه لاړل، زرګونه غړي یې ووژل شول، او لسګونه زره پلویان یې له خپلو ویجاړ شویو کورونو بې کوره شول.
لبنان لاهم د اسرائیلو سره د حزب الله د شخړې او په ۲۰۱۹ کال کې د پیل شوي مالي ویجاړۍ پایلو لاندې ډوب دی.
نړیوال بانک د مارچ په میاشت کې وویل چې لبنان د حزب الله او اسرائیلو تر جګړې وروسته د بیا رغونې لپاره شاوخوا ۱۱ میلیارده ډالرو ته اړتیا لري.
د نړیوال بانک له مخې، یوازې د استوګنې سکتور ته د واردو شویو زیانونو ارزښت ۴.۶ میلیارده ډالر اټکل شوی دی.
