د سوریې په پلازمېنه دمشق کې د داعش ترهګرې ډلې اړونده یوه حجره چې د ورانکارو بریدونو د ترسره کولو لپاره یې چمتووالی نیوه، له منځه یوړل شوه او ۳ داعشیان ونیول شول.

د ترکيې د ملي استخباراتو (MİT) د استخباراتي هڅو په پایله کې د داعش یوه حجره په نښه شوه. دغه ترلاسه شوي استخباراتي معلومات د سوریې د کورني امنیت خدماتو قوماندانۍ او د سوریې له عمومي استخباراتو سره شریک کړل.

د سوریې استخباراتو د یادې حجرې غړي او فعالیتونه یې تر څارنې لاندې ونیول. د حجرې د غړو، چې ګام په ګام تعقیبېدل، کره ځایونه په نښه شول.

پر حجرې د چاپې په پایله کې د داعش غړي عمر هاشم، محمد حامد او حسین خلف ونیول شول.

له عملیاتو سره هم‌مهاله، د بمونو شنډولو متخصصینو پر یوه بمي موټر هم اقدام وکړ چې له لرې څخه د چاودنې لپاره چمتو شوی او په یوه مهم ځای کې درول شوی و. په موټر کې په لویه کچه C4 او  TNT  چاودیدونکي مواد وموندل شول چې د لویې ویجاړۍ لامل کېدای شول.

نیول شوي ۳ کسان د سوریې د عمومي استخباراتو/ترهګرۍ سره د مبارزې ادارې ته وسپارل شول، ترڅو د دوی پوښتنې ګروېږنې بشپړې شي او د حجرې ملاتړي او احتمالي تړاوونه یې په ډاګه شي.

تېره اونۍ د داعش له خوا په یوه خپاره شوي غږیز پیغام کې د دغې ډلې عناصرو ته ویل شوي وو چې بریدونو ته چمتو اوسي. په دمشق کې د دغو عملیاتو په ترسره کولو سره، د ډلې د لارښوونې وروسته پلان شوی برید شنډ شو.