د سوریې نوو چارواکو د امریکا سره پدې جګړه ځپلي هېواد کې لادرکه  شوي امریکایان پیدا  او بیرته دې هیواد ته د سپارولو په اړه سره موافقه وکړه.

د سوریې لپاره د امریکا ځانګړي استازي، ټام باراک، د یکشنبې په ورځ په ایکس کې ولیکل: "د سوریې نوې حکومت موافقه کړې چې د امریکا متحده ایالتونو سره په سوریه کې د لا درکه شوو امریکايي وګړو د موندولو په برخه کې مرسته وکړي  او دا کسان بیرته مونږ ته وسپاري." هغه دا ګام "یو ځواکمن پرمختګ" وباله.

هغه زیاته کړه: "د آستین ټایس، مجد کمالماز، او کیلا مولر کورنۍ باید وضاحت ترلاسه کړي." هغه د هغو امریکایي اتباعو یادونه وکړه چې د ۲۰۱۱ کال د سوریې د ویجاړونکي کورنۍ جګړې پر مهال ورک شوي یا وژل شوي وو.

د امریکا او سوریې اړیکې د دسمبر په میاشت کې د سوریې پخوانی ولسمشر بشار الاسد د واکمنۍ د ړنګیدو او له واکه د لرې کیدو نه راپدیخوا مخ په ښه کیدو دي. د څه باندې یو لسیزې راهیسې  د دیپلوماتیکو اړیکو د بیرته جوړولو په اړه هلې ځلې پیل شوي دي.

ټایس د آزاد خبریال په توګه د اژانس فرانس پریس، واشنګټن پوسټ او نورو رسنیو لپاره کار کاوه کله چې هغه د ۲۰۱۲ کال د اګست په میاشت کې په یوه پوسته کې ونیول شو.

کمالماز، چې یو سوریایي-امریکایي رواني معالج و، باور کیږي چې هغه د ۲۰۱۷ کال کې د اسد د رژیم لخوا نیول کیدو وروسته مړ شوی و.

مولر، چې یوه مرستندویه کارکوونکې وه، د داعش لخوا وتښتول شوه. داعش د ۲۰۱۵ کال د فبرورۍ په میاشت کې د هغې د مرګ اعلان وکړ، ویې ویل چې هغه د اردن په یوه هوايي برید کې وژل شوې، خو د امریکا چارواکو دا ادعا رد کړه.

یو نوی فصل

دا اعلان یوه ورځ وروسته وشو کله چې امریکا په رسمي ډول د سوریې پر وړاندې بندیزونه لرې کړل، چې د دواړو هېوادونو ترمنځ په اړیکو په یوه نوي فصل د پیل نښه وه.

باراک، چې د تورکیې لپاره د امریکا سفیر هم دی، وویل: "ولسمشر (ډونالډ) ټرمپ دا روښانه کړې چې د امریکایي اتباعو کور ته راوستل یا د هغوی پاتې شونو ته په درناوي سره عزت ورکول په هر ځای کې یوه لوی لومړیتوب دی." هغه زیاته کړه: "د سوریې نوې حکومت به موږ سره په دې ژمنه کې مرسته وکړي."

د دواړو هېوادونو ترمنځ د خبرو اترو په اړه خبر یو سوریایي سرچینې وویل چې د واشنګټن په لیست کې ۱۱ نور نومونه هم شامل دي، چې ټول یې سوریایي-امریکایان دي.

د امریکا لخوا د بندیزونو رسمي لرې کول د سوریې د نوو چارواکو لخوا د کورنیو چارو وزارت د بیا تنظیم سره هم مهاله وشول، چې په کې د سرحدونو په اوږدو کې د مخدره توکو او انسانانو د قاچاق پر وړاندې مبارزه شامله ده، ځکه چې دوی هڅه کوي له لویدیځ سره اړیکې ښه کړي.

د بندیزونو لرې کول د جګړې ځپلي هېواد د بیا رغونې هڅو ته لاره هواروي، چیرې چې چارواکي د بیا رغونې د لوی لګښت په پوره کولو کې د بهرنیو مرستو پر تکیه کوي.

د سوریې د بهرنیو چارو وزارت د جمعې په ورځ د واشنګټن لخوا د بندیزونو لرې کول وستایل، او دا یې "د بشري او اقتصادي ستونزو د کمولو لپاره په سمه لاره کې یو مثبت ګام" وباله.