د ایران دولتي رسنۍ وايي، تهران د هوايي ځواک د الوتکې تر غورځېدو وروسته د ترسره کړو پلټنو له مخې الوتکه  د شپې د تمریناتو پر مهال راوغورځېدلې ده.

د ایران دولتي تلویزیون ویلي، چې د ایران یوه جنګي الوتکه رالوېدلې او له دوو پیلوټانو څخه یې یو ژوند د لاسه ورکړی دی.

د ایران دولتي تلویزیون پر ټیلیګرام لیکلي، چې د هوايي ځواک دا الوتکه د شپې ناوخته د همدان په لوېدیځ ولایت کې د یوه تمریني ماموریت پر مهال رالوېدلې ده.

سرچینې زیاته کړه: "د پېښې لامل تر څېړنې لاندې دی."

دا پېښه ایران ته نږدې د امریکا د پراخو پوځي تیاریو په منځ کې رامنځته شوې ده.

ولسمشر ډونالډ ټرمپ منځني ختیځ ته جنګي بېړۍ، جنګي الوتکې او نور پوځي تجهیزات استولي، ځکه هغه هڅه کوي چې ایران د اټومي بم له جوړولو منع کړي، خو تهران وايي چې داسې هڅه نه کوي.

ټرمپ په پرله پسې ډول ایران ته د پوځي اقدام ګواښ کړی، لومړی یې تېره میاشت پر لاریون کوونکو د خونړي برید او بیا وروسته یې د اټومي پروګرام له امله دا ګواښونه کړي دي.

د پنجشنبې په ورځ، ټرمپ وویل چې ایران تر ټولو ډېر ۱۵ ورځې وخت لري چې یوه معامله وکړي او بیا یې وړاندیز وکړ چې که داسې ونه کړي نو متحده ایالات به برید وکړي.

ایران په ځواب کې خبرداری ورکړی چې که امریکا خپل پوځي ګواښونه او بریدونه عملي کړي، نو د امریکا اډې، تاسیسات او شتمنۍ به "مشروع هدفونه" وي.

په ملګرو ملتونو کې د ایران سفیر، امیر سعید ایرواني، دا څرګندونې د ملګرو ملتونو سرمنشي انتونیو ګوتریش او د امنیت شورا رئیس ته په یوه لیک کې کړې دي.

په دې لیک کې د ټرمپ د چهارشنبې ورځې یوې ټولنیزې رسنۍ لیکنې ته اشاره شوې، چې پکې هغه ویلي وو، "که ایران پرېکړه وکړي چې معامله ونه کړي"، نو ممکن متحده ایالات د برتانیا پوځي اډو کارولو ته اړتیا ولري، چې په کې د هند په سمندر کې یو ټاپو هم شامل دی.

ایرواني په لیک کې لیکلي: "د امریکا د متحده ایالاتو د ولسمشر دا ډول جنګي څرګندونې... د پوځي یرغل یو ریښتینی خطر په ګوته کوي، چې پایلې به یې د سیمې لپاره ناورین وي او د نړیوالې سولې او امنیت لپاره به یو جدي ګواښ وي."

هغه له امنیت شورا څخه - چې د ملګرو ملتونو تر ټولو لوړه پرېکړه کوونکې اداره ده او واشنګټن پکې د ویټو حق لري - وغوښتل چې "ډاډ ترلاسه کړي چې متحده ایالات سمدستي د ځواک د کارولو خپل غیر قانوني ګواښونه ودروي."

د خبرو اترو یوه پخوانۍ هڅه هغه مهال ناکامه شوه کله چې اسرائیلو تېر جون پر ایران ناڅاپي بریدونه وکړل، چې ورسره ۱۲ ورځنۍ جګړه پیل شوه او واشنګټن هم د لنډ وخت لپاره پکې شامل شو ترڅو د ایران اټومي تاسیسات بمبار کړي.