پولیس د عیني شاهدانو له راپور وروسته سیمې ته ورسېدل او هغه اور یې چې کانټینرونو ته نږدې لګېدلی و، له خپرېدو وړاندې مړ کړ.
په دې پېښه کې چا ته زیان نه دی رسېدلی، خو په ساختماني ځای کې یو بل ناچاوده اور اخیستونکی توکی هم موندل شوی چې د بم شنډولو متخصصینو له خوا له منځه یووړل شو.
د باویریا پولیسو اعلان وکړ چې د دغه ایالت جنايي ادارې (LKA) د سیاسي انګېزې د شک له امله د اور اچونې د دغې هڅې په اړه څېړنې پیل کړې دي.
له پېښې وروسته په ترسره شویو عملیاتو کې، پولیسو په یوه نږدې تېلو پلورنځي کې دوه بهرني مشکوک کسان ونیول.
د "روده او شوارز" شرکت ویاند د عملیاتو پخلی کړی او ویلي یې دي چې د شرکت ودانیو ته کوم زیان نه دی رسېدلی. په ۲۰۲۱ کال کې هم د همدې شرکت په نږدې سیمه کې یو تخریبي (سبوتاژ) برید شوی و، چې عامل یې معلوم نه شو خو ادعا شوې وه چې هدف یې دفاعي صنایع وو.
په جرمني کې د تخریب (سبوتاژ) خطر
دا پېښه په داسې حال کې کېږي چې جرمني چارواکي د هېواد پر مهمو بنسټیزو تاسیساتو باندې د بریدونو د احتمال له امله په لوړ چمتووالي کې دي.
د اګسټ په ۴مه، د لایپزیګ-هالي (Leipzig-Halle) په هوایي ډګر کې د اوکراین د یوې باروړونکې الوتکې نږدې یوه بې پیلوټه الوتکه (ډرون) موندل شوې وه چې ګومان کېده چاودېدونکي توکي لري.
د امریکا استخباراتو ادعا کړې وه چې د دغه ډرون ځانګړنې د روسیې له نظامي استخباراتو سره سمون خوري. د جرمني حکومت پرون وویل چې په څېړنو کې ترلاسه شوي اسناد د روسیې مسوولیت په ګوته کوي او په دې اړه یې د یو لړ نویو امنیتي تدابیرو اعلان وکړ.
