حوثیانو د جولای په ۲۰مه اعلان وکړ چې د سعودي عربستان پر ضد یې "سمندري محاصره" پیل کړې ده.
په یمن کې د ایران تر ملاتړ لاندې حوثیانو (انصارالله غورځنګ) اعلان وکړ چې په سره سمندرګي کې یې د سعودي عربستان دوه د تېلو ټانکرونه د بې پیلوټه الوتکو (ډرون) او توغندیو په واسطه په نښه کړي دي.

د حوثیانو پوځي ویاند یحیی سریع په یوه ویډیویي بیان کې وویل چې دوی د سعودي عربستان اړوند د "ENCELIA" او "LAYLA" په نومونو دوه تېل وړونکي ټانکرونه ویشتلي دي. نوموړي ټینګار وکړ چې دغه ټانکرونه د تېرېدو له بندیز څخه د سرغړونې له امله په نښه شوي دي. سریع زیاته کړه: "دا عملیات د ګڼ شمېر بالستیک توغندیو، کروز توغندیو او بې پیلوټه الوتکو په واسطه ترسره شوي او هدفونه په کره ډول ویشتل شوي دي."

"شاوخوا ۱۰ کښتۍ بېرته ګرځېدو ته مجبورې شوې"
یحیی سریع وویل: "په همدې لړ کې، د یمن وسله والو ځواکونو (حوثیانو) شاوخوا ۱۰ نورې کښتۍ هم مجبورې کړې چې له خپلې لارې پر شا شي او بېرته وګرځي."

نوموړي د سعودي عربستان حکومت ته په مستقیم خبرداري کې وویل: "موږ غواړو دښمن سعودي عربستان ته ټینګار وکړو چې زموږ پر هېواد هر ډول حماقت یا تېری به د هغوی د خاورې په ژورو کې د لویو عملیاتو له لارې ځواب شي."

د ایران ملاتړو حوثیانو د جولای په ۲۰مه اعلان کړی و چې د سعودي عربستان پر وړاندې یې "سمندري محاصره" پیل کړې ده. د انصارالله پوځي ویاند سریع، سعودي عربستان تورن کړ چې "له شاوخوا ۱۲ کلونو راهیسې یې د یمن پر خلکو هراړخیزه محاصره لګولې، د هېواد سرچینې یې لوټلي او د ځمکنیو، سمندري او هوایي لارو په تړلو سره یې د خلکو کړاوونه تر زغم پورته کړي دي."